SPU udah tembu ngaga Perambu Besai Grid Ai - Berita Iban Online

Header Ads

  • Baru Nyadi

    SPU udah tembu ngaga Perambu Besai Grid Ai

    Dato Sri Dr. Stephen Rundi
    KUCHING: Perambu Besai Grid Ai udah tembu digaga begulai enggau Unit Perambu Besai Menua (SPU), lalu diatu semina mansik tiap iti perambu nya enggau silik aja, ku Menteri Bekal Ai enggau Elekterik Menua Pesisir Dato Sri Dr. Stephen Rundi anak Utom.

    Sebedau tu Kepala Menteri Datuk Patinggi Abang Johari Tun Openg kala madahka projek ngaga grid ai di menua tu deka digaga enggau ungkus RM7 bilion.

    “Perambu Besai udah tembu digaga enggau SPU, semina deka mansik enggau silik agi sebedau nya dipunka,” ku Dr. Rundi madah ba aum pengarang berita pengudah nguluka aum pengarang berita bekait enggau ‘4th International Sustainable Energy Summit (ISES) 2018’ di Opis Kepala Menteri di Wisma Bapa Malaysia ditu, kemari.

    Iya nandu baru madahka, enti nitih penanggul ai di menua tu bekait enggau proses magi, kelimpah ari batang paip ke nyau udah lama tauka tuai, sereta palan alai ngubat ai (treatment plant) ke lebih ari kapasiti.

    “Ketegal nya, Perintah Nengeri nguji mutarka penanggul ke dulu agi, nya kebuah grid ai nya meh ke deka dikena kitai jemah ila.

    “Reti nya, kitai tau ngambi ai ari tekad ai ke besai baka Bakun, Batang Ai enggau Murum,” ku iya lalu madahka pekara tu udah dipejuraika enggau Kepala Menteri, lalu ngaga grid ai tu dipelabaka tembu dalam kandang dua taun tu ila.

    Enti nitih ku iya,pengudah bejuraika pasal pekara nya enggau Kepala Menteri, pengawa magi ai deka dibagi nitihka zon, baka enti di Kuching datai ngagai Betong (Zon Selatan), Zon Tengah enggau Zon Utara.

    “Nyambung paip, pengawa ke mar endar, lalu ukai pengawa ke muntang ba Perintah Menua, tang diatu, Perintah Menua bisi chara ngulihka duit, ngambika kitai ulih mutarka penanggul tu,” ku iya.

    Ku iya baru, Perintah pechaya belanja ke diungkupka kena ngaga grid ai manggai RM7 bilion, tauka lebih ari nya, belanja dipelabaka mayuh agi ari nya dalam kandang 10 taun tu ila.

    “RM7 bilion nya semina chukup kena mutarka penanggul ke diatu aja.

    “Enti diperatika ba sekeda sitak ke nerima mayuh ripot ngelama tu, sitak ke napi penanggul tu ke patut diputarka dulu. Taja pia, di mengeri, penanggul bansa tu jarang endar nyadi,” ku iya.

    Ambika chunto, batang paip ti di kena diatu, sekeda nya udah lama nyangka manggai 40 taun ke mayuh udah tengelam sereta kering baka batu.

    “Nya kebuah Perintah Nengeri enda tau enda ngaga kar enggau manah, sereta ngena drone, siti teknologi tinggi, ke ulih masuk datai ngagai 800 kaki ke baruh, lalu ari nya, drone nya ulih madahka pemesai kar endur batang paip nya, enti batang paip nya agi ulih dikena tauka enda.

    “Enti nadai data bansa tu, kitai semina besagam dalam petang aja. Enti bisi sitak menua ke napi penanggul bansa tu (nadai ai), sitak tu dulu ke enda tau enda dikemutarka dulu,” ku iya.

    Dalam kandang lima taun ari diatu ngagai 15 taun tu ila, penanggul ai tekan ai kurang tauka enda chukup ai deka nyadi pekara ke udah lepas.

    “Perambu tu mega nyengkaum ngaga pelin bukai lalu pia mega elekterik di menua tu pan sama patut bisi pelin bukai. Enti stesyen ai rusak, kitai; bisi pelin bukai ke deka nganti ke rusak nya,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads