Header Ads

  • Berita Tebaru

    SRDC begunaka penerang silik bekaul penyampau ukui ditupi mensia mayuh

    Sempurai Petrus Ngelai
    SIBU: Opis Kaunsil Menua Pesisir Sibu (SRDC) begunaka penerang ke silik bekaul enggau penyampau ukui ke ditupi mensia mayuh ketegal penyakit rabies agi bisi nyadi nyentuk ke diatu.

    Chairman opis nya, Sempurai Petrus Ngelai madah, ketegal nya, piak sida deka beratika baru undang-undang ngeluarka lisin nupi ukui iya ke diatu enda engkeman agi.

    “Kami empai bisi atur ke engkeman tauka undang-undang diatu nadai ngemendarka piak kitai ngukum sida ke empai ngambi lisin ukui kelimpah semina ulih minta mensia mayuh ngerejister tauka ngambi lisin ukui tupi aja.

    “Nya alai, pekara tu deka dipansik baru,” pia ku iya maya aum media ba Opis SRDC di Wisma Sanyan ditu, kemari.

    Sempurai madah, udah pekara nya dipansik sida deka mantaika asil nya ngagai Opis Menteri Perintah Menua enggau Pengawa Berumah.

    Ku iya, lisin ukui nya beguna bendar ngambika piak sida nemu penerang ti silik enggau penyampau ukui ke ditupi ba menua ke dipegai SRDC.

    Iya madah, naka ke diatu sida empai bulih penerang ke silik bekaul enggau pekara nya.

    “Kitai napi penanggul ngulihka penerang ke silik bekaul enggau penyampau ukui ketegal menua ke dipegai SRDC tu bangat besai nyengkaum di rumah panjai.

    “Ketegal tu mega, piak kami deka muka kaunter ngerejister ukui tauka ngambi lisin ukui di Selangau enggau di Sibu Jaya enda lama agi,” ku iya sambil madah bayar ngambi lisin ukui iya nya RM1 (ukui lelaki) enggau RM2 (ukui indu).

    Agi bekaul enggau penyakit rabies, Sempurai sekali agi ngelalau mensia mayuh enda ngelakka ukui sida lepas ari kandang rumah.

    “Kitai mengkang nerima sebana ari mensia mayuh madahka agi bisi ukui dipeda bekedayau baka di pasar Sibu Jaya.

    “Kurung ukui kita ngambika enda lepas ari kandang rumah,” pia ku iya ngelalau.

    Iya madah, piak sida semampai chakah ngatur program vaksin rabies nyentuk ke diatu.

    “Kitai ngarapka mensia mayuh ulih datai mai ukui sida tuchuk vaksin rabies,” ku iya madah baru.

    Bela datai maya tu iya nya Pemesai Pekara Pengerai SRDC Mathew Paran Chungat. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: