Header Ads

  • Berita Tebaru

    SUPP enggau UPP patut ngiarka bida penemu

    BEBAIK MIH: Dr Sim enggau Wong  betabi ba rambau pengerami nya kemari.
    KUCHING: Parti Sa’ati Ra­yat Sarawak (SUPP) enggau Parti Rakyat Bersatu (UPP) patut ngiarka bida penemu ke pemaik komuniti China di Sarawak.

    Ketua Menteri ke mega Chairman Barisan Nasional (BN) Negeri Datuk Patinggi Abang Johari Tun Openg ma­dah, bepechah dalam komu­niti semina meri pemedis ngagai bansa nya empu.

    “Badu ingatka bida nya ke pemaik Sarawak laban aku andal nyema kitai beserakup lalu bekerejasama kitai deka ulih nagih hak kitai ari Kuala Lumpur.

    “Semina orang Sarawak ulih ngeringka hak orang Sarawak lalu ukai parti poli­tik ke datai ari Semenanjung baik nya PKR, DAP tauka UMNO,” ku iya.

    Iya madah munyi nya rambau pengerami Taun Baru China 2018 enggau Pengerami Makai Lemai Ulangtaun Ke-39 Serakup Besai Gerempung China Bagi Menua Kuching, Samara­han enggau Serian yang ke bela digulu Presiden SUPP Datuk Dr Sim Kui Hian eng­gau Presiden UPP Dato Sri Wong Soon Koh ditu malam ensanus.

    Kenu ku Abang Johari, enti kededua parti bekerejasama iya ukai semina ngenegapka komuniti Cina tang mega ra­yat Sarawak dalam sebarang aja utai ke dipinta.

    “Ba pengawa bepilih kunsil nengeri (PRN) ke udah kitai bisi SUPP ke mujur ngeram­pas penuduk ari penyakal lalu sida menang tujuh penuduk

     pia mega UPP, sida betanding ba lima penuduk, lalu semua nya menang. Enti dipegulai tujuh penuduk engga eng­gau lima penuduk nya tentu nyadi 12.

    “Nya mih bida iya, udah beserakup lalu pambar... nyadi enggau nya aku min­ta kededua parti ngiarka bida penemu ke pemaik Sarawak.

    “Nyema kitai patut patut ngalah diri ke pemaik nyadi patut ngereja nya nyengkaum ngagai Dr Sim enggau Dato Sri Wong, kitai nemu nya ukai utai muntang ngagai bala penyukung tang iarka nya ke pemaik komuniti China ari majak pambar,” ku iya.

    Tandu iya, Sarawak ngem­buan 31 penuduk Parlimen lalu nengah pengering semua komponen parti BN Sarawak abis nadai menang 28 tauka 29 penuduk Parlimen ba Pengawa Bepilih Besai Ke- 14 (PRU14) ngambika hak Sarawak ulih diambi ari perintah besai.

    Abang Johari madah, enti bisi kuasa politik ke tegap ba Sarawak nya deka meri peluang lalu ngemuntang nengeri tu bejaku ba Kuala Lumpur.

    Ba PRN ke udah, entara tujuh penuduk ke dimenang SUPP, Batu Kawa, Batu Kitang, Maradong, Repok, Senadin, Piasau enggau Si­manggang.

    Udah nya UPP, Bawang Assan, Dudong, Mambong, Engkilili enggau Opar.

    Berebak enggau nyam bekaul enggau isu bukai Abang Johari bisi ngungkup­ka agih belanja RM7 juta nga­gai sekula China ba Sarawak ari perintah nengeri.

    “Pekara pelajar endang pekara ke beguna amat lalu chukup semak ba ati bansa China, ngelama tu perintah endang seruran meri bantu ngagai sekula China lalu taun nyin kemari urung RM6 juta udah diberi.

    “Ungkup taun tu aku nam­bahka baru RM1 juta ungkup agih belanja lalu ngujungka semua penyampau bantu ungkup 2018 bisi RM7 juta,” ku iya. #UtusanBorneo

    No comments

    Post Top Ad