Tentuka penyerakup entara komuniti ungkup pemansang - Berita Iban Online

Header Ads

  • Baru Nyadi

    Tentuka penyerakup entara komuniti ungkup pemansang

    Datu Dr.Penguang Manggil
    Program makai lemai ulih nyadi pelasar ti engkeman ngempung, ngerapitka kaul semua kaban gerempung.

    MARUDI: Pengerami makai lemai ti bisi diatur ulih nyadi pemungkal dikena nempa penyerakup sereta gawa begulai ungkup gerempung bansa China ti pulaika pemaik pemansang komuniti, pia ku Menteri Muda Kaunsil Kandang Menua, Datu Dr.Penguang Manggil.

    “Nengah pengerami bansa tu ulih ngerapitka pemanah tanggam kaul antara komuniti China enggau komuniti Dayak ke bukai ti bisi datai malam tu.

    “Ambika chunto, pengawa gempuru Taun Baru China taun tu diatur Serakup Foochow Baram, lalu taun dudi nyangka gintir Serakup Hakka tauka Serakup Kwong Tung, tu mih awak endur kitai betemu sereta begulai enggau pangan diri, baka ke bisi dipeda malam tu,” ku iya.

    Berindik ari nya, ku Penguang madah komuniti China ditu mega patut beserakup enggau pangan diri. Perintah nengah pengari rayat Barisan Nasional (BN), baka iya empu enggau Kaban Parlimen (MP) Baram, Anyi Ngau, beratika bansa China ditu seruran beserakup, perintah mega enda sanggu nyediaka mayuh agi pemansang ngagai kandang menua Marudi.

    Ku iya nandu, baka udah ditemu semua, iya ti baru setaun semilan bulan udah nyadi pengari rayat tang iya udah mujur mai lebih ari RM200 juta ungkus pemansang lalu tu udah nyata dipeda.

    “Kitai deka berati silik pasal penanggul enggau isu ke ditapi peranak ditu. Nya kebuah, kita meseti begempung sereta meri sukung kitai ngagai chalun BN maya Pengawa Bepilih Besai Ke-14 (PRU14) ti deka datai,” ku iya.

    Datu Dr Penguang ke mega Kaban Kunsil Nengeri (ADUN) Marudi mansutka jaku tu lebuh bejaku ba Pengerami Taun Baru China ti diatur di Palan Sivik Baram ari raban Serakup Foochow Baram.

    Pengerami lemai nya udah dipenyadi Kaban Parlimen (MP) Bintulu ke nyadi Presiden PDP, Datuk Seri Tiong King Sing, lalu bela digulu MP Baram, Anyi Ngau.

    Lebih ari 1,000 iku mensia mayuh ari kandang menua dia datai ngulu pengerami nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads