Header Ads

  • Berita Tebaru

    Teritka agi atur bekaul orang ti nyadung berita ke enda betul

    Dato Sri Fatimah Abdullah
    KUCHING: Kaunsil Tetinggi Ketuai Orang Indu Pergerakan Wanita Parti Pesaka Bumiputera Bersatu (MTW PBB) Sarawak enggau Kaunsil Orang Indu sereta Ruang Bilik Sarawak (MWKS) minta polis begulai enggau pemesai penguasa Opis Menteri Komunikesyen enggau Multimedia (MCMC) majakka pengawa nasat sereta ngambi atur ti terit nitihka ungkup undang-undang menua tu bekaul orang ke bejai sereta ngaga petenah pasal orang bukai, enda ngira penuduk tauka sapa orang nya.

    Ketuai Indu PBB, Dato Sri Fatimah Abdullah madah sida di MTW PBB enggau MWKS bediri tegap sereta beserakup mantah orang ke milih mantaika berita ke enda betul sereta meri nama jai ngagai orang ke ngaga petenah nya.

    “Pekara ke di taburka di laman rama udah suah dipadah YB Dato Sri Nancy Shukri (Menteri di Opis Menteri Besai ti mega nyadi Mandal Ketuai Indu PBB) ba jaku ke dipansutka dalam taun 2015, iya nya jaku iya di ambi luar ari konteks jaku iya, lalu udah suah endar di kenataika iya, lalu patut diketuka tekala nya,” ku Fatimah.

    Iya madah munyi nya lebuh bejaku ba aum pengarang berita bekait enggau pekara tu, ke digulu pemesai indu PBB bukai di opis iya di Baitulmakmur ditu, kemari.

    Fatimah ti mega nyadi Menteri Pengelantang Pendiau, Komuniti, Orang Indu, Ruang Bilik enggau Anak Mit nandu baru madahka jaku ke ditabur lalu nyadi ‘viral’ ba laman rama ke mantaika jaku ti ukai semina enda manah ke nyebut Nancy, tang mega jaku munyi nya ngemaruh sereta ngemaluka orang indu.

    “Ngangau orang indu, indu sempit jaku ke pengabis nya jai, tambah agi jaku ke munyi nya dipadah ngagai siku ketuai indu sereta menteri ke mayuh udah gawa sereta mai pemansang ngagai menua,” ku iya.

    Dalam penerang Nancy bekaul jaku iya kena 15 Disember 2015, jaku nya diputar belit ti madahka Nancy tu bisi nyebut, ‘Bumiputera tu enti enda dibantu, enchuri’.

    Beserimbai enggau nya, Nancy udah nerang madahka penyakal enggau ati ke enda ngasaika diri salah, bemain enggau jaku nya ngambika rayat ringat kelebih agi bansa Bumiputera.

    “Aku agi ingat, dalam bulan November 2013, pengarang berita ari sida penyakal nanya aku, ‘enti Perintah bisi ati (guts) deka ngemunaska polisi diskriminasyen?’ Lalu aku ngasuh sida nandu minta terangka agi bekaul tanya nya. Ku pengarang berita nya nyaut aku, ‘NEP’. Udah nya aku nyaut baru, enti deka nyemelaka ekonomi di dalam sebuah menua, bisi maya kitai betatika pekara ti timpang dikena nyemela hal nya.

    “Dalam pekara tu, Perintah ngaga polisi 30 peratus ke Bumiputera, taja pia, nya lalu bedau ulih dijapai. Ambika chunto, bisi orang bukai ke deka bejalaika pengawa dagang sereta deka ngulihka penguntung, orang ke bedagang nya enda tau enda bisi orang meli. Enti orang ke meli nya ari raban majoriti, lalu sida nadai pemisi deka meli, raban majoriti nya mih ke enda tau enda dibantu.

    “Kitai pan sama nemu, iya nya ekonomi ke enda sebela, ngujungka kitai napi penanggul pengawa rama, ambika chunto, orang enchuri lebuh sida iya enda ulih meli. Bisi ke enda aku madah Bumiputera enchuri? Aku semina nerang pasal polisi ke udah lama bisi. Aku enda ulih ngauka pengarang berita, aku deka mai pekara nya, ngagai perintah, minta perintah nukar polisi nya. Kelebih agi ngagai Bumiputera, enti sida iya deka nganu aku ketegal aku negapka polisi ke enda ulih diterima sida iya, awakka sida iya empu meratika pekara nya kediri empu.

    “Nya alai, uji berunding enggau chara realistik lebuh ngaga timbal tauka nganu. Pekara nya nyadi kena 8 November 2013. Lalu datai ke seharitu, jaku aku diputar belit baru,” ku Nancy nerang. #UtusanBorneo

    No comments

    Post Top Ad