Header Ads

  • Berita Tebaru

    Tetiap tuai rumah meseti komited enggau lurus bejalaika pengawa, ku Mong

    Datuk Mong Dagang
    Tanggungpengawa tu ari pilih peranak di tetiap genturung pendiau ti udah ngelempaika pechaya ngagai tuai rumah ngarika sida.

    SRI AMAN: Tetiap tuai rumah ti udah diberi tanggungpengawa megai sebuah rumah panjai meseti megai tanggungpengawa sida enggau lurus, komited sereta enda bechiping.

    Pengawa nyadi tuai rumah tu iya nya siti tanggungpengawa ke dilempai nembiak redak ba tetiap genturung pendiau dikena nentuka bisi pengari ari renggat baruh ke ulih mai penanggul ti ditapi sereta ngulihka pemansang ungkup pemaik semua komuniti ngagai piak ti bekaul, ku Kaban Kunsil Nengeri (ADUN) Bukit Begunan Datuk Mong Dagang.

    “Tetiap kita ti datai seharitu iya nya pengari rayat ba renggat baruh ti udah diberi mandat nampung baru tanggungpengawa nyadi tuai rumah sereta mega bisi sekeda nya ke baru dichiri nyadi tuai rumah. Kita tu megai pengawa ti endang chukup berat iya nya nyadi jematan entara rayat enggau perintah.

    “Nyadi pengari ungkup genturung pendiau kita iya nya ketegal ari pilih peranak ti ngembuan tetiap rumah panjai, lalu tu mai reti ti besai iya nya semua nembiak redak kita udah ngelempaika pechaya ngagai kita ngari sereta ngemansangka genturung pendiau ti diuwan. Berindik ari nya kita meseti bejalaika pengawa enggau lurus, komited sereta enda bechiping baka sempama ‘nadai runggang baka pededang mata kati, nadai lilih baka benih padi wi’,” ku iya lebuh ti meri jaku lalau maya Pengerami Betemu enggau Sapit Menteri Dalam Menua II begulai enggau Ketuai Ejensi, Ketuai Komuniti sereta Gerempung Ukai Dikuasa Perintah (NGO) lalu pia mega pengawa Nyuaka Setipikit Nyiri Tuai Rumah sereta Tuai Kaum ti bepalan ba Dewan Datuk Mong Dagang, Sekula Primari (SK) Munggu Bringin ditu.

    Bekaul enggau pengerami nya, Mong mega udah nandu ngambika semua 117 iku tuai rumah di sitak DUN Bukit Begunan ngambika sama gawa enggau perintah ngambika atur pemansang ti dipejalai enda dikeruga. Pia mega iya nyemetak madahka pangku pengawa tuai rumah tu deka dikemendar nyema siku tuai rumah bisi lebih ari 20 pintu bilik ti dipegai.

    “Aku deka nangkan tetiap tuai rumah, ngambika nemu iya nya nyema kita bisi lebih ari 20 pintu bilik, baru peminta kita nyadi tuai rumah deka dikemendar lalu nerima setipikit.

    “Kelimpah ari nya, nadai pengari rayat tauka ADUN bisi hak muai tuai rumah kelimpah ari tuai rumah nya empu deka ngelengkaka pengawa iya. Nya ukai tanggungpengawa kami pengari rayat muai tuai rumah tang semua tu ari tuai rumah nya empu tauka ari randau nembiak redak sida empu,” ku iya nyemetak.

    Ungkup tuai rumah di sitak DUN Bukit Begunan, ku iya, sida patut nemu iya nya bisi Gerempung Ketuai Komuniti Bukit Begunan udah ditumbuh lalu direjista ba Opis Pengerejista Gerempung (ROS) kenyau ari taun 2016.

    “Mayuh piak enda nemu Gerempung Ketuai Komuniti Bukit Begunan udah direjista ba ROS kenyau ari taun 2016. Lalu, aku deka nangkan semua tuai rumah ti baru dichiri ngambika ngerejista diri enggau gerempung tu dikena ngintu pengelantang pendiau sereta nemu pekara ti bisi nyadi ke ngaul organisasyen genturung pendiau ti ulih dipadah ngagai nembiak redak dipegai kita.

    Kelimpah ari nya, Mong ngarapka piak ti bekaul ngambika ngemendar enggau lengkas agih belanja nyeruri jalai alun ari simpang Keranggas ngagai Menangkin, jalai ari Menangkin ngagai Menuang, jalai ari Simpang Engkeranji ngagai Semulong Ulu sereta jalai ari simpang Menangkin ke Munggu Sawa. Iya udah meda kediri empu enggau Injinir Pelilih Opis Kereja Raya (JKR) Sri Aman ba taun 2017 tu tadi.

    Ba kenang ke bukai, Mong ngambi awak nya nangkan semua rayat di konstitusyen pegai iya ngambika meri sukung ngagai Dato Masir Kujat ke deka bediri lebuh Pengawa Bepilih Besai Ke-14 (PRU14) ti deka datai.

    “Aku minta kita meri sukung rat ngagai YB Dato Masir lebuh PRU14 ti deka datai. Bakani sukung kita ngagai aku rambau Pengawa Bepilih Nengeri (PRN) suba, baka nya mih kita nyukung YB Dato,” ku iya.

    Ba pengerami nya, Mong udah ngemendarka agih belanja sepenyampau RM10,000 ungkup Gerempung Apai Indai enggau Pengajar (PIBG) SK Munggu Bringin lalu RM30,000 ungkup Gerempung Ketuai Komuniti Bukit Begunan ungkup sida bejalaika program semanjai taun tu.

    Sama bisi datai ba pengerami nya, Kaban Parlimen (MP) Sri Aman Dato Masir Kujat sereta bala ke bukai. #UtusanBorneo

    No comments

    Post Top Ad