Header Ads

  • Berita Tebaru

    Tujuh buah agi PTKRP deka ditumbuh di rumah panjai dalam sitak Nangka

    NYAUP: Dr Annuar (kiba) mantu ngajar bala nembiak Rumah Bungan Jaya, Batu 8 Jalai Oya ditu ngaga kereja rumah sida.
    SIBU: Menteri Muda Pelajar enggau Pansik Teknologi, Dr Annuar Rapaee deka numbuhka tujuh agi Palan Tuisyen Komuniti Rumah Panjai (PTKRP) di rumah panjai ari  baruh sitak Nangka taun tu.

    Pekara tu berindik ari pemujur lima palan ke baka nya ti ditumbuh dalam taun nyin tadi nangkup peminta pelajar nembiak mit di rumah panjai, ku iya, seraya madahka program tu disedia enggau nadai bebayar.

    “Tujuh buah rumah panjai ke bukai dalam kandang menua Nangka deka bisi PTKRP taun tu lalu ngujungka semua penyampau nya manggai 12 buah rumah panjai.

    “Tu dikena ngangkatka tikas penyulut pelajar bala nembiak mit di rumah panjai tu kelebih agi dalam subjek English, Matematik enggau Sains,” ku iya pengudah ngabas PTKRP di Rumah Bungan Jaya, Batu 8 ditu, apin lama ke udah.

    Palan di Rumah Bungan Jaya ti keterubah endar ditumbuh dalam taun siti nyin tadi lalu diatu bisi nerima nembiak ari Primari Satu ngagai Primari Enam ninting malam Hari Satu ngagai Hari Empat.

    Dr Annuar, ke mega Menteri Muda Pengawa Berumah enggau Pengerai Mensia Mayuh, nerangka PTKRP tu dilangkar kena nerenak pemanah ulah ngagai bala nembiak mit di rumah panjai ngambi nembuka kereja rumah sida sereta nandu baru pelajar malam hari.

    Ku Kaban Kunsil Nengeri (ADUN) Nangka nambah, bisi pengajar mantu ngajar bala nembiak ngaga kereja rumah sida tetiap dua malam seminggu.

    Pengajar tu mega deka ngajar sida kelebih agi ba batang subjek baka English, Matematik enggau Sains, ku iya.

    Kelimpah ari nya ku iya, program tu deka meri pengasai ngempu laban nya ngaul bala tuai rumah panjai sereta nembiak redak iya.

    Bala tuai rumah deka ngatur gintir ngagai bala apai indai ngemataka kelas malam nya.

    “Muak ke malam, maya pengajar nadai, apai indai deka ngambi gintir ngemataka kelas malam nentuka bala anak nembuka kereja rumah sida.

    “Kitai dekaka apai indai dikaul dalam program tu ngambika sida berat agi ke pelajar bala anak sida, seraya ngemanahka agi kaul kerejasama antara sida.”

    Tambah mega ku Dr Annuar, kaul bala apai indai nyadi kunchi ngenegapka program tu.

    Ngenang pasal batang tuju program nya, iya nyemetak madahka keterubah endar dikena nerenak ulah nembuka kereja rumah sida sereta nandu pelajar kelimpah macha ngagai bala nembiak di rumah panjai.

    Pia mega ku iya, pekara ke pemadu beguna iya nya pelajar bala anak.

    Ku Dr Annuar nambah, juluk PTKRP dikena ngangkatka penyulut akademik nembiak nengah licha ti diberi.

    Tambah mega, nyadi program tuisyen bepelasarka komuniti, ku iya, dikena meri sukung ngagai semua peranak di rumah panjai.

    Berebak enggau nya, Tuai Rumah Bungan Jaya madahka program tu udah mai empas positif ngagai bala nembiak di rumah panjai iya.

    Ba pekara tu, bala nembiak diatu suah nandu kereja sekula sida, ku iya, seraya nambah pekara tu beguna endar ngagai sida ti deka napi peresa perintah ila.

    Bungan madahka nembiak sekula sekondari mega bisi ati deka nyereta kelas malam nya.

    “Ba pekara tu, kami minta semilan iti agi mija dikena nangkup peminta nembiak laban 15 mija ke bisi diatu udah dikena bala nembiak. Bisi mega peminta kipas enggau mayuh agi lampu ngambi meri palan kekondusif agi ngagai sida maya  kelas malam.

    “Semua peranak di rumah panjai aku deka meri terima kasih ngagai YB Dr Annuar ketegal pengiruh iya ba pekara pelajar bala anak kami. Iya mungkal program tu laban iya deka meda bala nembiak di rumah panjai nyulut dalam akademik,” ku iya. #UtusanBorneo

    No comments

    Post Top Ad