Ubah rama deka digaga mungkur semua pekara, ku Abang Johari - Berita Iban Online

Header Ads

  • Baru Nyadi

    Ubah rama deka digaga mungkur semua pekara, ku Abang Johari

    UNGKUP NGO: Abang Johari (dua kanan) nerima pemeri RM2 juta ari Shamsur ba program bejadi ‘Hari Terbuka KWKPK’ di Kuching kemari. Bela dipeda (ari kanan) Fatimah enggau Juma’ani.
    Ubah nya deka dipejalaika di serata nengeri nengah chara ‘makro’ ba pekara ke bekaul enggau pengawa rama.

    KUCHING: Kepala Menteri Datuk Patinggi Abang Johari Tun Openg keran ngaga ubah ba pekara rama di serata nengeri tu.

    Ku iya, ubah rama nya deka dikemujur nengah chara ‘makro’, iya nya mungkur semua pekara ke bekaul enggau pengawa rama.

    “Chara makro mungkur ruang bilik, gaya pendiau ngelingi, perengkaguna sereta pengawa ke digaga komuniti.

    “Aku dekaka ubah rama ari endur diau nyentuk ke atur penyambung, rekreasyen ngagai interaksyen lalu komuniti patut enda ditinggal,” ku iya.

    Abang Johari mansutka jaku nya maya bejadi Program ‘Hari Terbuka Opis Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak (KWKPK)’ di Waterfront Kuching ditu, kemari.

    Iya nambah perambu ngaga sistem Light Rail Transit (LRT) ditu deka nentuka ubah ba pekara rama tau nyadi nyata.

    “LRT ba aku chukup beguna. Rayat kitai begunaka sistem perengka pengangkut ke manah.

    “Sistem LRT deka digaga di luar kandang mengeri ke alai rega tanah enda mar enti dibandingka enggau dalam kandang mengeri,” ku iya.

    Ngenang kaul ke sama, Abang Johari madah rumah ke ulih dibeli deka digaga besemak enggau sistem LRT.

    Ku iya enti rega tanah enda mar, kitai ulih ngaga rumah ngena ungkus ke mit lalu ulih dibeli rayat.

    Ila, deka bisi sistem penyambung ngagai kandang mengeri iya nya urung 30 minit nepan LRT, tandu iya.

    Beambika chunto Serian, Bau enggau Lundu, iya madahka rumah ulih digaga ba pelilih nya lalu disambung enggau Sistem LRT.

    “Rayat ulih mindah ari Kuching ngagai genturung pendiau tu lalu nya mih kebuah aku sanggup ngeluarka belanja ba LRT.

    “Kelimpah ari nya, temuai ulih nguna sistem LRT lalu sida enda deka ditipu ketegal bayar sistem tu sama (udah ditetap),” ku iya.

    Ba program kemari, Petronas Sarawak ti diarika Menijar Besai Shamsur Taha bisi nyuaka RM2 juta ngagai Perintah Nengeri.

    Pemeri ari Petronas nya deka diagih ngagai 224 gerempung ke ukai dikuasa perintah (NGO) ngambika tau dikena ngatur program.

    Bela bisi datai bini Abang Johari, Datin Patinggi Dato Juma’ani Tuanku Bujang, Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak (KWKPK) Datuk Sri Fatimah Abdullah, Menteri Muda pengelantang Komuniti Datuk Francis Harden enggau Menteri Muda Pelajar Tumu Nembiak enggau pemansang Ruang Bilik Rosey Yunus. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads