Undang-undang baru nagang berita pelesu patut mungkur semua piak - Berita Iban Online

Header Ads

  • Baru Nyadi

    Undang-undang baru nagang berita pelesu patut mungkur semua piak

    Dr Awang Azman Awang Pawi
    KUCHING: Pangku pengawa undang-undang baru dikena nagang berita pelesu enda ulih ditatak enggau madahka penerit atur iya semina dikena nyaga chalun ti bediri minta pilih aja maya Pengawa Bepilih Besai (PRU) ke-14 ti deka datai.

    Kaban Akademik Profesor Madya di Jabatan Sosiobudaya Universiti Malaya (UM) Dr Awang Azman Awang Pawi madahka undang-undang baru nya pengudah diterit ila, iya deka nyaga semua raban ari napi berita pelesu.

    “Undang-undang baru tu beguna endar ngagai semua raban. Iya nyaga sebarang orang ari napi berita pelesu ti tau ngemalu, salah pilih tauka runding sereta ngerusak institusyen ke bisi,” ku iya.

    Ku iya nambah, udah umbas endur akta nagang berita pelesu dipejalai laban kandang diatu empas pemadah besai endar lalu suah agi ngundan berita pelesu.

    Nitih ku iya, bisi siti renggat komuniti mar mida antara amat enggau bula.

    Ku iya nambah, ari penyampau pengguna internet urung 25 juta, pengawa tu beguna endar dikena nagang ulah nadai tanggungpengawa, enda menuku.

    Enti enda ditagang ku iya, pekara tu tau nyadi laya ngagai bala komuniti enggau menua.

    “Berita pelesu tau nyadi petenah ngagai orang ngatika diri, parti politik, dagang, serakup, sarikat, institusyen enggau ke bukai.

    “Enti udah ngelekai, mar deka ditagang enggau dibatak pulai. Berita pelesu mega mayuh agi jaku mejah, ngemalu enggau ngelesey dataika ngasut ngagai pekara diri empu ti enda patut,” ku iya.

    Pia mega ku iya, berita pelesu mayuh ngaul pengasai ati orang ti macha dikena minta kasih lalu orang ti nabur nadai runding ti menyana laban kelalu nitihka asai ati enggau pengeringat diri aja.

    Nya kebuah ku iya, pengawa perintah bejalaika atur terit endang patut dikena nentuka ulah ke bansa nya enda majak nyadi.

    “Taja menua kitai udah bisi Akta Komunikasi dan Multimedia 1998, Suruhanjaya Komunikasi dan Multimedia Malaysia ti megai tanggungpengawa matau enggau mutarka isu sensitive ti ngeruga pengelikun menua baka isu jalai pengarap bansa enggau main asal.

    “Akta Suruhanjaya Komunikasi dan Multimedia bisi tanggungpengawa mutarka semua pekara bekaul enggau internet sereta ngambi kuasa lesen ngagai spektrum penabur enggau pemadah,” ku iya nerang.

    Tang iya bepenemu nyangka akta tambah dipejalai dikena nentuka berita pelesu ditagang ngambika semua raban sensitive ngagai pupu etnik lalu limpang ari pekara negative, sensasyen enggau provokatif.

    “Berita pelesu ditagang dikena nyamin penegap politik rama enggau pemaik kaul etnik enggau jalai pengarap menua tu,” ku iya nambah.

    Iya mansutka jaku nya ngelansa pasal penerang di Opis Menteri Besai Datuk seri Azalina Othman Said apin lama ke udah, madahka draf undang-undang baru dikena nagang berita pelesu dikearap ulih dibantai ngagai kabinet enda lama da agi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads