Header Ads

  • Berita Tebaru

    Ungkus belanja pengidup besai ketegal peniki gaji enda sebaka

    Datuk Wan Zain Syed Mohdzar
    MIRI: Peniki gaji ti niki enda sebaka nyadi faktor ti ngujungka belanja pengidup besai lalu ngujungka pengulih belanja rayat majak nurun.

    Aktivis Rama Komuniti, Datuk Wan Zain Syed Mohdzar madah penyampau ‘ungkus’ gaji majak mit di mengeri berindik ari penyampau inflasi niki.

    “Gaji enda setipak enggau belanja idup ke alai kuasa meli rayat majak nurun laban sida nadai duit ungkup belanja,” ku iya madah ngagai Utusan Borneo kemari.

    Ku Wan Zain, pekara tu ngujungka belanja meli barang di palan bebelika barang ngayanka pengerembai ti negatif.

    “Endang amat mata duit Malaysia majak tegap tang kuasa beli rayat majak nurun ketegal kadar inflasi majak tinggi,” ku iya madah nyemetak.

    Kelimpah ari komuniti bepenatai pemisi baruh, orang ti ngembuan penatai pemisi tengan pemesai ti tebal agi komuniti Malaysia bela ngasaika pangka iya.

    Peniki rega barang ti diguna enggau pemakai, diumba enggau belanja pengangkut ninting hari enggau suwa rumah majak nating pengidup rayat.

    “Ukai semua pengaji ulih nikika gaji pekereja sida enggau gaya ekonomi enda tentu, nya kebuah mayuh pengaji nutup dagang sida sereta penyampau tubuh orang nadai kereja majak mayuh,” ku iya.

    Berebak enggau nya, rayat mega ditating Chukai Barang enggau Servis (GST) laban rega barang majak mar.

    “Gaji ga majak mit, barang bisi GST, raban bepenatai pemisi baruh majak lenyau kuasa meli,” ku iya.

    Perintah ku iya madah nyemetak, patut beratika gaya rayat di renggat baruh sereta ngiga jalai dikena mantu raban diselinting tu.

    “Enti pengaji nadai bulih penguntung, sida enda tetikika gaji pekereja lalu bisi antara pengaji muai pekereja ketegal tating eknomi,” ku iya.

    Iya beratika ekonomi Malaysia enda ngerembai baka ti disebut perintah laban pekara nyata pengidup rayat agi enda tegap.

    Berindik ari nya, perintah patut ngiga jalai mantu mansutka ekonomi rayat sereta mulaika kuasa beli rayat. #UtusanBorneo

    No comments

    Post Top Ad