UPP nganti pemutus KM mutarka penyarut enggau SUPP - Berita Iban Online

Header Ads

  • Baru Nyadi

    UPP nganti pemutus KM mutarka penyarut enggau SUPP

    Datuk Dr Jerip Susil
    KUCHING: United People’s Party (UPP) benung nganti atur ari Kepala Menteri Datuk Patinggi Abang Johari Tun Openg, mutarka penyarut entara partinya nya enggau Parti Sa’ati Rayat Sarawak (SUPP).

    Sapit presiden UPP ti mega nyadi Menteri Muda Pengangkut, Datuk Dr Jerip Susil madah UPP benung nganti atur kemaya, bakani sereta jalai mutarka penyarut nya.

    “Aku nadai madahka UPP deka mulaika diri ngagai SUPP, nya atur ke diberi Kepala Menteri. Barang ku pemutus Kepala Menteri, kami nitihka sadang iya, tang sebedau nya, meri awak kami berandau enggau iya dulu, lalu nganti jaku lalau ari iya (Kepala Menteri).

    “Kami mega patut mendingka timbal ari renggat baruh pasal pekara tu, lalu beratika bakani kami patut nimbal sadang Kepala Menteri,” ku Dr Jerip.

    Iya madah munyi nya lebuh dikerandau pengarang berita pengudah ngemunka atur pengawa Kimpin Pengelikun Jalai Alun beserimbai enggau Taun baru Cina renggat Menua Sarawak 2018 di Kuching Sentral ditu, kemari.

    Taja pia, iya madah UPP pechaya Kepala Menteri bisi ‘formula’ bakani deka mutarka penanggul nya enggau naka pemanah.

    “Iya (Kepala Menteri) baru mantaika pekara tu kemari (lebuh ngepunka atur pengawa Gempuru Besai Parti Pesaka Bumiputera Bersatu (PBB) ke digaga ari 8 nyentukka 11 Februari tu tadi di Palan Aum Borneo Kuching (BCCK) ti bela digulu Menteri Besai Datuk Seri Mohd Najib Tun Razak, lalu ari jaku lalau iya nyangka deka ngambi timpuh ke panjai mimit laban kami enda tau enda nerang pasal pekara tu ngagai renggat baruh,” ku iya.

    Ba tanya pengarang berita sentang pekara bekaul nyema UPP deka pulai begempung baru enggau SUPP, Dr Jerip madahka pekara nya bepanggai ba penemu Kepala Menteri.

    “Aku enda ulih netapka pemulai UPP ngagai SUPP, agenda nya bepanggai ba penemu Kepala Menteri.

    “Kami pan enda ulih mutuska pekara tu kediri, awakka Kepala Menteri berunding pasal pekara tu, nyangka iya bisi program, tauka jalai tauka agenda bakani deka mutarka penanggul tu, enggau naka pemanah.

    “Runding kami bepanggai ba naka utai ke dikerunding Ke-pala Menteri. Kami patut meri timbal sereta nitihka penemu Kepala Menteri,” ku iya.

    Abang Johari ti mega nyadi Presiden PBB bisi nyebut pasal pekara nya dalam jaku iya ba Gempuru Besai PBB di BCCK, hari Enam minggu nyin tadi, ti dipenyadi Menteri Besai Datuk Seri Mohd Najib Tun Razak.

    Presiden UPP ti mega nyadi Menteri E-Dagang sereta Menteri Wang Kedua, Dato Sri Wong Soon Koh enggau Dr Jerip empu, sebagi ari kabinet nengeri sereta BN Sarawak.

    Raban UPP sereta Wong empu sama bisi ngenataika diri ngagai gempuru besai PBB nya.

    Wong mega kala madahka, iya udah nganjung lis nama chalun ‘ke ulih menang’ ngagai pemesai BN ke Pengawa Bepilih Besai Menua (Parlimen) ke-14 tu ila. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads