WhatsApp Group MIDT, PWD ditumbuh dikena ngenyampatka timbal ba pekara ngintu jalai - Berita Iban Online

Header Ads

  • Baru Nyadi

    WhatsApp Group MIDT, PWD ditumbuh dikena ngenyampatka timbal ba pekara ngintu jalai

    Tan Sri Datuk Amar Dr James Jemut Masing
    KUCHING: Opis Menteri Pemansang Infrastruktur enggau Perengka Pengangkut (MIDT) sereta Opis Kereja Raya (PWD) Nengeri udah numbuhka WhatsApp Group dikena meri timbal jampat ngagai sebarang pengawa ngemanahka jalai enggau ngintu kelebih agi maya musim pengujan ke diatu, pia ku Sapit Kepala Menteri enggau Menteri Pemansang Infrastruktur enggau Perengka Pengangkut Tan Sri Datuk Amar Dr James Jemut Masing.

    Ku iya, endang patut dua ejensi nya bekerejasama laban nengeri tu ukai kaya endar ngembuan mayuh jalai besai di serata nengeri.

    “PWD Nengeri enggau MIDT udah numbuhka WhatsApp Group ke alai semua injinir di tetiap pelilih menua enggau raban aku ari MIDT deka disambung. Nya alai, ba sebarang pekara ke nyadi, kitai deka meri timbal tekala nya lalu bejalaika pengawa ngintu enggau ngemanah ke patut enggau naka penyampat.

    “Ba kes ti nyadi apin lama ke udah, ngemanahka jalai di semanjai Jalai Serian-Sri Aman, ke alai sebagi ari jalai nya putus. Nengah WhatsApp Group, kami ulih jampat agi nimbal ari chara ke lama,” ku Masing madah ngagai The Borneo Post ensanus.

    Ku Masing baru, maya musim pengujan diatu, raban ari MIDT enggau stafn PWD bela udah dianjung gawa berindik ari mayuh jalai di nengeri tu udah rusak ketegal ujan enda ngengetu.

    Ba isu ke bekaul, ku Masing, Cahaya Mata Sarawak (CMS) udah dipadu gawa meresi sebarang tanah tusur di sepanjai Jalai Menjawah-Belaga lalu kompeni ke bukai deka dianjung gawa ngintu jalai di sepanjai 34 km jalai ti digaga raban soldadu ari baruh Program Jiwa Murni.

    Pengawa CMS diatu meresi tanah tusur ti ngalitka jalai tumu pagi bedau lama udah ti ngujungka Belaga putus ari dunya luar, sekali agi.

    “Opis menteri aku deka meri kunterik ngangkatmanah jalai nya enda lama agi. Kami mega udah meri pengawa nya ngagai CMS meresi sebarang tanah tusur di sepanjai jalai,” ku iya, seraya madahka agih belanja RM86 juta apin lama ke udah deka dikena ngangkatmanahka jalai nya enda lama agi.

    Rambau pejalai keterubah iya ngagai Belaga kena 27 Disember taun nyin tadi, Abang Johari udah ngemendarka agih belanja penyampau RM86 juta dikena ngangkatmanahka jalai. Jalai nya sigi mudah tusur ketegal kelalu tebiang sereta tanah enda tegap. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads