Header Ads

  • Berita Tebaru

    127 kes dirikod KPDNKK Sarawak ari 1 Januari ngagai 10 April 2018

    Abd Hafidz A. Rahim
    KUCHING: Urung 127 kes bekaul enggau bemacham penyalah enggau penyampau barang ke kena rampas dalam urung RM280,751.45 bisi dirikod ulih Opis Menteri Dagang Dalam Menua, Koperasi enggau Pekara Bebeli Barang (KPDNKK) Sarawak ari timpuh 1 Januari ngagai 10 April taun tu.

    Sapit Direktor KPDNKK Sarawak, Abd Hafidz A. Rahim madah, pengawa nya asil ari operasi meresa urung 12,359 palan di serata menua Sarawak, iya nya urung 9,377 palan tauka kedai di mengeri enggau 2,982 palan di menua pesisir.

    Ari peresa nya, ku iya, mandangka opis menteri nya ukai semina betatika sitak mengeri aja tang mega di menua pesisir laban pengawa meresa bansa tu ke pemerat pengguna.

    “Berindik ari nya, ari asil peresa kami ba urung 12,359 palan dalam timpuh nya, kami udah ngerikod urung 127 kes enggau penyampau barang ke kena rampas manggai urung RM280,751.45, lali penyampau kompaun dalam RM12,950.

    “Kesemua (127) kes nya, bekait enggau undang-undang nengah genteran tusun ukum ‘Akta Kawalan Harga dan Anti Pencatutan 2011, Akta Kawalan Bekalan 1961, Akta Perihal Dagangan 2011, Akta Timbang dan Sukat 1972 dan Akta Pelindungan Pengguna 1999,” ku iya.

    Iya madah munyi nya lebuh dikerandau ulih pengarang berita pengudah enggau ngulu atur pengawa Gempuru Ninting Bulan KPDNKK Sarawak, ke digaga beserimbai enggau pengerami Hari Bejalaika Atur Kuasa ke-46 ti dipejadi ulih Direktor KPDNKK Sarawak, Datuk Stanley Tan ditu, kemari.

    Ba atur pengawa nya mega, pengawa nyerahka surat serah pangku pengawa Abd. Hafidz ngagai Mohd Nawawi Abd Rahman ke deka nganti pangku pengawa nya, bela dipejalaika.

    Abd Hafidz ti mega nyadi Ketuai Pegawai Bejalaika Atur Kuasa KPDNKK Sarawak nandu baru madahka, ari 127 kes nya, 37 penyalah diletak baruh ‘Akta Kawalan Harga dan Anti  Pencatutan 2011’, 8 kes (Akta Kawalan Bekalan 1961), 33 kes (Akta Perihal Dagangan 2011), 48 kes (Akta Timbang dan Sukat 1972) lalu siti kes nengah ‘Akta  Pelindungan Pengguna 1999’.

    “Nengah ‘Akta Kawalan Harga dan Anti Pencatutan 2011’, opis menteri mujur ngerikod 37 kes enggau penyampau ke kena rampas urung RM4,387.25 lalu penyampau kompaun, dalam RM4,950.

    “Nengah ‘Akta Kawalan Bekalan 1961’, urung 8 kes enggau penyampau urung RM30,000 mujur dirikod lalu penyampau kompaun, agi ditasat,” ku iya.

    Kelimpah ari nya, nengah ‘Akta Perihal Dagangan 2011’, iya madah, opis menteri nya ngambi atur kuasa ba 33 kes ke bisi bekait enggau penyampau barang ke kena rampas manggai urung RM237,095.20, enggau penyampau kompaun dalam RM2,200.

    “ke penyalah nengah ‘Akta Timbang dan Sukat 1972’, urung 48 kes mujur dirikod kami enggau penyampau barang ke kena rampas dalam RM8,960 lalu penyampau kompaun dalam RM5,800.

    “Lalu nnegah ‘Akta  Pelindungan Pengguna 1999’, kami mujur ngerikod siti kes enggau penyampau barang ke kena rampas dalam RM309,” ku iya, lalu nandu baru madahka piak sida iya deka majakka bejalai atur undang-undang baruh KPDNKK ngambika atur nya deka dititih ulih sida ke bedagang.

    Abd Hafidz mega madahka kemplin ke bisi diterima ulih opis menteri nya ke taun tu, udah dikemutar nitihka atur ungkup undang-undang KPDNKK. #UtusanBorneo

    No comments

    Post Top Ad