67,000 peranak Sarawak nganti peluang meli rumah
Cari Berita

Advertisement

67,000 peranak Sarawak nganti peluang meli rumah

Chief Editor | Berita Iban MY
April 30, 2018

Abang Johari berami enggau peranak ke nguwan RMR1M di Sungai Miding ditu seharitu.

KUCHING: Penyampau 67,000 rayat Sarawak di serata nengeri mengkang nganti peluang meli rumah ke ulih dibeli (mampu milik).

Kepala Menteri Datuk Patinggi Abang Johari Tun Openg madah, tebal agi sida ke nganti peluang nya diau di kandang mengeri.

"Pekara ke nyadi diatu iya nya kandang mengeri udah kelalu dedat, nadai tanah endur nirika genturung berumah agi.

"Kitai semina ulih nirika 'apartment' lalu tu dikerindu sida ke biak," ku iya mansutka jaku nya ngagai pemberita pengudah nemuai kereja ke Rumah Mesra Rakyat 1Malaysia (RMR1M) Sg. Midin, Samariang, sehari tu.

Dikena mutarka isu tu ku iya nambah, genturung berumah meseti digaga ba tanah ke jauh mimit ari kandang mengeri.

"Tang kitai meseti nyikap genturung berumah ke baru nya enggau perengka pengangkut ngambika sida ulih nurun ke mengeri.

"Ketegal tu mih aku deka ngaga LRT, ngambika kitai ulih muka kandang endur baru endur nirika rumah," ku Abang Johari.

Iya nambah rumah ba kandang baru nya jemah ila enda mar ketegal rega tanah endur nirika rumah nya enda mar.

Nengah atur tu mayuh rayat kitai ulih meli rumah, tandu iya.

Abang Johari netap rega rumah ke baruh ari RM250,000 mengkang ulih dibeli rayat.

"Tang rumah 'Semi D' ke dijual nengah rega RM600,000 sereta rumah 'teres' ke berega entara RM300, 000 nyentuk ngagai RM400,000 pan mengkang mar," ku iya. #UtusanBorneo