Header Ads

  • Berita Tebaru

    Anang kelalu arapka jaku ti ayan ba media rama, ku Salang

    Datuk Joseph Salang
    SARIKEI: Rayat di menua pesisir tau bendar bepenusah enti sida kelalu arapka jaku ti dibantai ba media rama.

    Sekretari Besai Parti Rayat Sarawak (PRS) Datuk Joseph Salang madah, diatu mayuh orang mantaika jaku nengah media rama tang jaku sida nya enda ditemu amat.

    “Entara jaku ke suah dipeda kitai iya nya sida bebendar madahka pengari rayat Barisan Nasional (BN) enda tebaikka pemansang ngagai rayat.

    “Tang enti rayat arap nyengkaum rayat di menua pesisir jaku ti enda amat baka nya tau mai pengerugi,” pia ku iya madah.

    Iya mantaika jaku nya maya pengerami makai lemai ke digulu lebih 600 iku mensia mayuh nyengkaum bala tuai rumah ari lebih 500 buah rumah panjai Parlimen Julau di Sarikei, kilah ensana.

    Sida ke datai tu penyereta kus bekaul enggau pengawa nyadi ketuai ti diatur beserimbai enggau Fiesta Strategi Tasik Biru Nasional (NBOS) ditu.

    Nambahka jaku iya, Salang madah pemansang besai baka jalai alun ke besai, supermakit tauka industri enda ulih digaga di Pakan enggau Julau ketegal penyampau rayat dia naka ke diatu enda mayuh.

    “Sekeda orang ke suah bejai perintah tu patut beterima kasih laban sida mega diatu udah nengah jalai alun ke manah, enda ngena perau baka kelia.

    “Sida enda ingat ari ni maya diatu sida ulih bekenaka telefon taja ba endur ke jauh,” ku iya madah baru.

    Ba pemansang ku Salang, pemansang baka bekal ai beresi tauka kuasa karan ukai labuh ari langit.

    “Aku udah bebendar mai pemansang ngagai Parlimen Julau sekumbang 18 taun ke udah ngambika rayat ditu ngasaika pengidup ti lantang.

    “Semua tu ukai datai pia aja tang bekenaka timpuh.

    “Nya alai, anang beguai mejah enti sekeda endur empai silik disikap enggau pemansang. Semua projek besai baka jalai alun endang bekenaka timpuh sebedau ulih digaga,” pia ku iya nerang.

    Salang mega madah, naka ke diatu Parlimen Julau udah bisi 25 iti legit telekomunikaysen ti pemadu mayuh ari menua bukai di nengeri tu.

    “Penyampau tu deka nambah 10 iti agi enda lama agi,” ku iya madah.

    Ba penanggul suntuk ari beresi, iya madahka diri udah mantaika pekara nya ngagai Menteri Besai Datuk Seri Najib Tun Razak empu minta agih RM62 juta dikena ngemanah enggau ngemesaika agi palan ngubat ai ngambika mayuh agi menua ba parlimen nya disambung enggau bekal ai beresi.

    Ku iya, pekara nya mega kala dipadahka iya ngagai Najib maya ke ngabang Gawai ngagai Rumah Mathew Jana beberapa taun ke udah.

    “Kelimpah ari nya, aku endang suah mai pekara tu dirandau ba aum parlimen.

    “Ketegal nya diatu Opis Menteri Pemansang Menua Pesisir enggau Kandang Menua beung beratika pengawa deka ngaduka projek tu,” pia ku iya.

    Ngenang menua Julau enggau Pakan nadai mayuh stisin minyak, iya madah, pengawa ngaga stisin minyak nya dikerejakompeni luar.

    Berebak enggau tu mega, Salang nimbal isu ‘tong biru’ ti suah dikena penyakal bejai BN ngelama tu.

    Ku iya, projek nya semina diberi ngagai rumah panjai enti tuai rumah sida minta.

    “Ba media rama piak penyakal tu udu bejai projek ‘tong biru’. Tang sida enda nemu pemesi reti projek tu ngagai menua pesisir ti empai datai ai beresi.

    “Nama kebuah sida landik bejai BN ditu tang enda madah ngagai rayat ditu sentang menua ke dipegai penyakal di Semenanjung Malaysia ti mega empai silik dikemansangka sida.

    “Uji nemuai ngagai Permatang Pauh. Pengari rayat dia suba Datuk Seri Anwar Ibrahim, iya mega kala nyadi sapit menteri besai.

    “Enti ba nengeri baka di Selangor enggau Pulau Pinang, nengeri tu udah mayuh dikemansangka BN suba sebedau diambi penyakal ba taun 2008,” pia ku iya nimbal.

    Dulu agi ari tu, Pemancha Datuk Janggu Banyang ba penemu iya madahka pengawa piak ti bejai BN nengah media rama tebal agi jaku ke digaga sida nya nadai amat.

    “Ba aku, aku pechaya 90 peratus nama utai ke ditulis sida nya endang bula, petenah enggau jaku tempa datai ari penemu diri.

    “Ambika banding, pechaya ke enda kita ex-presiden Amerika Syarikat Barrack Obama ulih bejaku Iban maya meri jaku Gawai Dayak nengah Facebook dua taun ke udah?,” ku iya maya nya.

    Seninjik diatu ku Janggu udah bisi Akta Anti Berita Tidak Benar alai orang baka nya anang enda bejimat udah tu ila.

    Maya tu mega iya bela ngelalau bala tuai rumah anang salah kena kuasa sida tauka alah dipelitik orang bukai nyukung chalun ukai ari BN semina ketegal diberi duit ringgit. #UtusanBorneo

    No comments

    Post Top Ad