Header Ads

  • Berita Tebaru

    Apai indai dipinta nyukung semua perambu sekula

    Dr Abdul Rahman Junaidi
    KUCHING: Apai indai dipinta terus meri sukung ngagai semua perambu sekula dikena nentuka bala anak nerima pelajar ti bekualiti.

    Menteri Muda Elekterik Menua Pesisir, Dr Abdul Rahman Junaidi madah, peransang enggau penyiru bala apai indai ba pelajar bala anak endang beguna endar laban nya ulih nempa pengidup ti meruan agi ba rebak baru nya.

    “Tu nyadi pengarap enggau pengandal kitai nempa bala anak ti mujur ba pelajar lalu terus mujur ba pengidup dudi hari.

    “Nya alai aku minta apai indai seruran siru sereta bebendar enggau nyukung tetiap perambu sekula sekalika ba pekara pemansang sekula tauka pelajar bala anak,” ku iya.

    Iya mansutka jaku nya lebuh bejaku ba pengawa Ngenang Pemanah Pengawa enggau Aum Besai Serakup Apai Indai enggau Pengajar (PIBG) Sekula Primari (SK) Pulo 2018 ditu, kemari.

    Ku Dr Abdul Rahman,kelimpah ari nya, apai indai dikeingat ngambika nemu pengerembai bala anak lalu enda ngelempaika tanggungpengawa nyeridi bala sida ba bala pengajar aja.

    “Kelimpah nyadi ketuai renggat baruh enggau kaban komuniti, apai indai patut ngaul rat bala pengajar di sekula anak sida empu.

    “Kebuah pia, pemisi kerejasama manah antara kededua raban ulih mantu ngerembaika pelajar bala anak lalu meri peransang ngagai sida ngambi bebendar agi sereta nempa pengidup dudi hari ti nyulut,” ku iya.

    Ngelansa pasal pengawa sehari nya, iya meri jaku puji sereta ngenang pemanah pengawa raban ngatur pengawa sekula enggau PIBG laban udah ngemansang sereta nambahka pemanah perengka guna SK Pulo ngambika rampa manah agi sereta ungkup pengelantang bala nembiak.

    “Penatai apai indai baa um besai sehari tu mega ngayanka pengeran sida mantu sekula ba perambu ngangkatka pelajar bala anak.

    “Pengeran apai indai mantu sekula meri peransang ngagai bala anak ngambika mujur ba pelajar,” ku iya ke mega Kaban Kunsil Nengeri (ADUN) Pantai Damai.

    Berebak enggau nya Dr Abdul Rahman mega meri terima kasih ngagai Kepala Pengajar SK Pulo, Rapaee Sabol ti deka pinchin dalam bulan April tu.

    Ku iya, Rapaee udah mayuh udah ngaga pemanah ba pekara pelajar di beberapa buah sekula dalam sitak Bepilih Kunsil Nengeri (DUN) Pantai Damai. #UtusanBorneo

    No comments

    Post Top Ad