Header Ads

  • Berita Tebaru

    Beri sukung penuh ngagai Najib ba PRU14: Abang Johari

    SEATI: Abang Johari(empat kanan) begulai enggau kaban Raban Pengawa Bepilih nyadaka lagu Barisan Nasional. Bela dipeda Fadillah (empat kiba).
    KUCHING: Kepala Menteri Datuk Patinggi Abang Johari Tun Openg ngelalau peranak Sarawak meri sukung ngagai Menteri Besai Datuk Seri Najib Tun Razak ba Pengawa bepilih besai ke-14(PRU14).

    Bejaku ba pengawa ngelanchar Raban PRU14, P194 Petra Jaya di Palan Aum Penview ditu kemari, iya madah Najib udah mayuh mantu Sarawak enti dibandingka enggau Menteri Besai ke dulu.

    “Aku nyukung Najib ketegal iya udah mayuh meri bantu ngagai kitai di Sarawak. Tu ketegal kitai keran deka ngemansang ka nengeri.

    “Ari sukut pekara pelajar, Universiti Swinburne diberi Najib maya iya nyadi menteri pelajar lalu pia mega Universiti Curtin.

    “Ari nya kitai ulih ngemansangka anak kitai ba pengawa besekula lalu sida bulih degree,”ku iya.

    Abang Johari mega madah pemanah kaul entara Perintah Nengeri enggau Najib ngujungka mayuh pemansang ari Perintah Besai udah datai di Sarawak.

    “Ambika chunto projek jalai besai Borneo enggau jalai Sibu ke Kapit diatu benung digaga.

    “Mayuh projek besai dibai Datuk Najib kitu enti dibandingka enggau Menteri Besai ke dulu ti udah megai kuasa pengelama 22 taun,”ku iya.

    Pengawa kemari bela digulu penyandang Parlimen P194 ke mega Menteri Kereja Raya, Dato Sri Fadillah Yusuf.

    Ngenang sentang PRU14, Abang Johari ke nyadi Chairman Barisan Nasional (BN) Nengeri pechaya chalun BN di Petra Jaya sekali agi deka menang besai.

    “Maya kitai napi pengawa bepilih, pekara ke ngasuh kitai menang besai iya nya ketegal kitai udah sedia.

    “Kedua, kitai nusun raban pengawa bepilih enggau manah. Ketiga kitai meri pengarap ngagai pengundi sentang kuing pemansang kitai jemah.

    “Keempat iya nya ketegal penegap penyerakup kitai. Tu mih semua pemaik ke dikembuan di Petra Jaya,”ku iya.

    Ba pengawa kemari, iya ke mega Presiden Parti Pesaka Bumiputera Bersatu(PBB) seraya betundi madah Fadillah disadang ngenanka penuduk parlimen Petra Jaya.

    “Fadillah bisi nama nyadi chalun Petra Jaya tang aku enda ulih madah diatu.

    “Datuk Najib ( Chairman BN Menua) bedau meri aku kuasa mantaika nama chalun,”ku iya.

    Abang Johari nambah, pemansang ke balat nyadi di Petra Jaya diatu asil pemanah kaul Perintah Besai enggau Perintah Nengeri.

    ku iya, pemansang asil kerejasama pengari rayat kitai ti udah mayuh meri bantu, ke alai iya mega siku menteri.

    Pengawa digulu Direktor Operasyen Raban Pengawa  Bepilih PRU14, P194 Petra Jaya ke mega Menteri Muda ba Opis Kepala Menteri sereta ADUN Semariang Sharifah Hasidah Sayeed Aman Ghazali.

    Bela datai Sapit Operasyen Raban Pengawa  Bepilih PRU14, P194 Petra Jaya ke mega ADUN Tupong Fazzrudin Abdul Rahman. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: