Chalun SUPP ungkup sitak Lanang dilempai ba indu parti - Berita Iban Online

Header Ads

  • Baru Nyadi

    Chalun SUPP ungkup sitak Lanang dilempai ba indu parti

    Wong Ching Yong
    SIBU: Parti Sa’ati Rayat Sarawak (SUPP) di Sibu manggai ba indu parti mantaika nama chalun sida ke bediri minta pilih ba penuduk Parlimen Lanang maya Pengawa Bepilih Besai Ke-14 (PRU14) ti deka datai.

    Chairman SUPP Pampang Dudong Wong Ching Yong madah, taja pan baka nya, sida ba Sibu andal chalun SUPP endang deka bediri dia.

    “Sapa nama chalun nya bepanggai ba indu parti madah ila,” pia ku maya nyaut tanya pengarang berita, kemari.

    Dulu agi ari tu, iya ngulu pengawa bejadi Lagu Barisan Nasional (BN)/ SUPP P211 Lanang ditu, kemari.

    Maya Pesta Rakyat Durin 2018 minggu siti tadi, Presiden SUPP Datuk Dr Sim Kui Hian udah meri ulu lungga ti nyemetak sapa bagi chalun sida bediri ba Parlimen Lanang.

    Bejaku ba mua urung 2,000 iku mensia mayuh ke bisi datai maya nya, iya bisi nyebut “Nyema iya (mai reti ngagai nama Kelvin Kong) menang ba PRU14 tu, semua penanggul di Lanang ulih diputarka.

    Tang maya nya, iya beguai nyebut baru “err minta ampun...nyema BN menang ba PRU tu, semua penanggul di Lanang ulih diputarka”.

    Taja pia, enda ulih ditentuka baikka jaku iya nya disengaja tauka terlanjur sebut.

    Kelimpah ari nya, Dr Sim bisi nyebut nyema BN mujur ngambi penuduk Parlimen Lanang, iya madahka Pasar Durin deka dipilih alai ngerami pemujur nya ila.

    Jaku iya tu tampak baka ke nyebut Kelvin nyadi chalun laban Kelvin endang orang asal ari Durin.

    Pengerami nya mega maya nya bisi digulu Kelvin ti dulu agi bejaku ari Dr Sim.

    Ba pengawa bejadi Lagu Barisan Nasional (BN)/ SUPP P211 Lanang nya kemari, Wong madah, lagu tauka rambai jaku endang meseti bisi dikena parti maya bekimpin nyerumba pengawa bepilih.

    Ba lagu iya madah, sida ngena rambai jaku ‘We Are Different’.

    “Kebuah kitai ngena rambai jaku tu laban SUPP siti ari parti di Sarawak enda sama enggau parti politik ke bukai di Semenanjung Malaysia.

    “Kedua, kitai tu bebida enggau Semenanjung Malaysia laban kitai semampai idup likun begulai enggau pangan diri ti enda sama bansa, jalai pengidup enggau pengarap,” ku iya nerang.

    Kelimpah ari nya, Wong mega madahka SUPP tauka Parti Pesaka Bumiputera Bersatu (PBB) endang bisi kuasa diri empu, nadai minta pemendar tauka enda ngibuhka jaku ari parti politik Semenanjung Malaysia enti deka ngaga nama-nama pemutus.

    Pengawa nya bela digulu Chairman SUPP Pati Bukit Assek Chieng Buong Toon, Sapit Chairman SUPP Pati Dudong dipegai Kelvin Kong enggau Ketuai Raban Nembiak SUPP Bukit Assek Joseph Chieng sereta bala kaban parti ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads