Dr Michael Teo muka kaunter meri rebet GST sehari tu - Berita Iban Online

Header Ads

  • Baru Nyadi

    Dr Michael Teo muka kaunter meri rebet GST sehari tu

    Dr Michael Teo
    MIRI: Kaban Parlimen (MP) Miri, Dr Michael Teo muka kaunter di luar Klinik Teo iya ditu sehari tu (1 April) meri rebet tauka sebagi ari rega diberi pulai Chukai Barang enggau Servis (GST) ba pemakai enggau bemacham bil ngagai mensia mayuh.

    Inisiatif tu iya nya pengawa Pakatan Keadilan Rakyat (PKR) Miri dalam kimpin nasional Pakatan Harapan (PH) dikena minta nginsil GST.

    Mantaika penerang silik pasal kaunter rebet GST, ke mega nyadi Penyanding Penemu PKR Sarawak madahka iya deka meri rebet GST ti dichaj ba bil pemakai enggau bebelika bemacham barang baruh baruh RM150 ti dipandang ba tetiap bil dikeluar di kaunter tu kena Hari Minggu (sehari tu) berengkah ari pukul 11 pagi nyentuk ke pukul 3 lemai.

    “Kenyau ari GST dipejalai di Malaysia kena 1 April 2015, rayat udah majak nyadi seranta. Sida ti bepenatai pemisi mit enggau jelan iya balat kena pangka. Penatai pemisi sida enda tetanggupka peniki rega pemakai enggau bemacham bil lalu kualiti idup sida udah dikemaruh,” ku iya madah nyemetak ke alai GST patut enda dipejalai di Malaysia.

    “Sepuluh taun ke udah, Malaysia dipangka penanggul pantis sereta rua ba belanja ketegal  pengelemi ngatur belanja, lalu nadai pengawa udah digaga dikena ngenan sida ti bepenanggul tu. Tang perintah besai ngaga chukai ngagai semua rayat Malaysia dikena mutarka penanggul belanja ti dibasau sida,” ku iya nambah ba penerang berita ti dikeluarka.

    Nengah Pengawa Bepilih Besai Ke-14 (PRU14), ku Dr Teo nandu, gempung PH ke alai PKR nyadi parti komponen, udah setuju deka nginsil GST dalam kandang 100 hari nyema gempung nya diundi numbuhka perintah.

    “Kami endang keran ba ubah institusyen perintah enggau kami mutarka isu makai suap, pengelemi enggau masau belanja rayat. Nadai kebuah nating semua peranak Malaysia enggau rejim GST enti sema kitai bisi ngatur pengawa enggau manah,” ku iya nandu.

    Nya alai iya ngansak peranak Miri betemu enggau iya sereta bala ketuai PKR nengeri ba kaunter rebet GST iya sehari tu, ngambi meretika agi bekaul enggau anti-GST PH sereta mega manifesto nasional sida. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads