Header Ads

  • Berita Tebaru

    INFRA pampang Sarawak tembu digaga Jun 2018

    Fadillah ba penemuai kereja ke palan projek kampus INFRA pampang Sarawak di Kota Samarahan, seharitu.

    KUCHING: Kampus latih Institut Pemansang Genturung Pendiau (INFRA) pampang Sarawak deka tembu digaga ba bulan Jun 2018.

    Menteri Kereja Raya Datuk Seri Fadillah Yusof madah, projek diatu udah manggai 87 peratus ke alai diatu semina nembuka pengawa ke bekait enggau kereja teknikel.

    "Projek patut tembu ba bulan Februari 2018 tang ketegal ti bisi napi sekeda penanggul, pejalai projek tejanggal mimit.

    "Kitai ngelanjar timpuh tembu ngagai kuntrektor lalu patut tembu sehari tu. Tang ketegal bisi isu teknikel, timpuh tembu sekali agi dilanjar.

    "Naka ke sehari tu, projek manggai ikas 87 peratus tembu,"ku iya ba aum pengarang di palan projek di Kota Samarahan ditu, sehari tu.

    INFRA pampang Sarawak ke beungkus RM55.6 juta nyadi sebengkah projek pemansang nengah Langgur Pemansang Malaysia Lumpar ke Sepuluh (RMK10)

    Institut deka meri peluang ngagai raban ketuai pupu bansa (bala tuai rumah), nembiak, orang indu sereta peranak menua pesisir ngulihka latih ke bisi disedia INFRA ke dikuasa Opis Menteri Pemansang Menua Pesisir enggau Kandang Menua (KKLW).

    Fadillah nambah KKLW disadang ngepunka program diploma di institut nya ba bulan Disember taun tu.

    Institut di Kota Samarahan tu nyadi kampus latih kedua INFRA pengudah kampus besai di Bangi, Selangor. #UtusanBorneo

    No comments

    Post Top Ad