Header Ads

  • Berita Tebaru

    Insentif RM1,000 sebulan ungkup orang indu siti ari manifesto PBDSB

    MERI PENERANG: Anek (tengah) bejaku ngagai pengarang berita di Kuching kemari.Bela dipeda Cobbold (kanan) enggau Sylvia.
    KUCHING: Meri insentif RM1,000 sebulan ngagai orang indu ke ngintu ruang bilik ke beumur 25 nyentuk ngagai 45 taun entara sekeda manisfesto Parti Bansa Dayak Sarawak Baru (PBDSB).

    Sapit Presiden PBDSB Patrick Anek anak Uren madah pemeri nya dikena meri basa ngagai orang indu ti udah ngaga semua pengawa ngintu ruang bilik pengelama lebih 20 taun.

    “Orang indu patut nerima insentif RM1,000 ungkup pemanah pengawa ke alai sida mega udah nempa raban nembiak ti beguna jemah,’ku iya.

    Anek mansutka jaku nya ba aum pengarang berita ke bela digulu presiden Cobbold John Lusui di Kuching kemari.

    Iya nambah rintai penuh manisfesto PBDSB deka dibantai ba awak ke semak, ke alai diatu semua pekara ke bekaul enggau manifesto benung dipejurai komiti tinggi parti.

    Ngenang sentang Pengawa Bepilih Besai ke-14(PRU14), Anek madah parti deka nyabung enda kurang ari 10 iku chalun.

    Taja pia, iya netapka rintai nama chalun nya semina deka ditemu maya hari nganjung nama chalun.

    “Semua chalun kitai deka bediri minta pilih ba penuduk parlimen ke majoriti diuan tauka ngarika pengundi bansa Dayak.

    “Kitai ukai deka ngelaban sesapa tang ke berat deka ngari sereta negika hak peranak Sarawak kelebih agi bansa Dayak,’ku iya.

    Anek nambah, ba PRU14 PBDSB deka bisi siku chalun  orang indu lalu chalun nya udah dikelala.

    Dulu agi ari tu PBDSB udah mantaika sekeda chalun ke alai presiden (Cobbold) deka bediri di sitak Parlimen Sri Aman, Johnny Chuat di Lubok Antu, Mengga Mikui di Selangau, Anek di Mas Gading, Rapelson Richard di Batang Sadong.

    Parti mega ngining penuduk parlimen Kapit, Julau, Kanowit, Limbang, Serian enggau Puncak Borneo.

    Ungkup parlimen Saratok, PBDSB udah netap deka nyukung chalun Parti Keadilan Rakyat (PKR) Ali Biju.

    Bela datai ngulu aum pengarang berita, Ketuai bagi Nembiak enggau Orang Indu Rapelson Richard enggau Sylvia John. #UtusanBorneo

    No comments

    Post Top Ad