Header Ads

  • Berita Tebaru

    KGBS ngarapka belanja ti diungkup dikena ngemanah sekula tuai, repuk amat bisi

    Ahmad Malie
    KUCHING: Dikearapka ungkup belanja dikena ngemanahka 116 buah sekula ke udah tuai sereta repuk di Sarawak amat bisi sereta nyadi nyata, dikena nentuka nembiak nerima sereta bulih pelajar ti meruan.

    Pekara nya dikearapka Kesatuan Guru Bumiputera  Sarawak (KGBS) nengah presiden, Ahmad Malie.

    Ahmad madahka KGBS nyambut manah pengeran Opis Menteri Pelajar Malaysia (KPM) ti deka meda nembiak nerima sereta bulih pelajar meruan lebuh perintah nengah opis menteri ngungkupka belanja sepenyampau RM2.5 bilion dikena ngemanahka sekula  tuai sereta repuk di serata menua.

    “Ke pemadu ngasuh KGBS gaga ati iya nya sepenyampau RM1 billion diungkupka dikena ngemanahka 116 buah sekula ke udah tuai sereta repuk di Sarawak berengkah ari taun tu ngena chara IBS (Industrial Building Systems).

    “Bepelasarka pekara ke dibantaika nya, KGBS amat ngarapka ungkup belanja nya datai ba semua 116 buah sekula ke udah ditetapka Opis Pelajar Nengeri Sarawak,” ku iya madah ngagai Utusan Borneo.

    Berebak enggau tu Ahmad mega madahka KGBS ngarapka enggau pemayuh ungkup belanja nya, fizikal enggau perengkaguna sekula ti bekaul ulih ditembu nitihka timpuh ke udah ditetapka.

    Kebuah pia ku iya, nya dikena nentuka nembiak enggau pengajar ulih ngasaika akses pelajar ti meruan agi baka ti dikeinginka ngelama tu.

    “Nya alai KGBS meri terima kasih ngagai perintah nengah KPM ke udah mandangka pengibuh perintah pba sentang pemansang pelajar nembiak di menua tu enda ngira bansa, chura kulit enggau sosio-ekonomi nembiak,” ku iya.

    Apin lama di Kuala Lumpur nitihka berita portal, Menteri Pelajar Datuk Seri Mahdzir Khalid ba Dewan Rakyat madahka bisi 394 projek ngemanahka sekula tuai sereta repuk di serata menua, ti benung dipejalaika diatu.

    Menteri nya madahka projek nya mungkur 158 projek di Semenanjung, 120 projek di Sabah enggau 116 projek di Sarawak.

    Sekula tuai sereta repuk tu dipilih digaga baru bepelasarka fizikal ti enda meruan, enda ulih dikena agi, enda likun sereta ulih ngeruga nyawa, ku iya.

    Mahdzir madahka pemgawa milih sekula nya diperambu Opis Pelajar Nengeri enggau pegawai Opis pelilih menua lalu chara ngaga nya ngena IBS laban ungkus ti lebih murah. #UtusanBorneo

    No comments

    Post Top Ad