Header Ads

  • Berita Tebaru

    KM: ‘Floating Solar’ teknologi ke tau ngemansut kuasa

    PRODUK LONGi: Abang Jo ngemata modul solar ke dipansut gudang LONGi (Kuching) Sdn Bhd.
    KUCHING: Kepala Menteri Datuk Patinggi Abang Johari Tun Openg merambu ‘Floating Solar’ nyadi sebengkah agi teknologi ke tau ngemansut kuasa, diuji di Palan Hidro Elekterik (HEP) di nengeri tu.

    Ku iya, konsep nya enti mujur digaga deka nyadi siti agi kuasa tambah kelimpah ari HEP sereta engkeman dikena di menua pesisir.

    Berindik enggau nya, iya ngenataika pinta ngagai LONGi Green Energy Technology Co.Ltd.(LONGi) ngambi ulih ngaga ‘Floating Solar’ di palan HEP baka di Bakun.

    “Sarawak (HEP) ngemansut kuasa nengah turbin lalu kompeni ari menua China(LONGi) ulih berundingka chara masang ‘Floating Solar’ ke dipelepu ba ai lalu nyimpan kuasa ari panchar panas.

    ‘Konsep tu tau nyendia kuasa(lekterik) ngagai kandang menua pesisir baka ke ngagai rumah panjai,”ku Abang Johari.

    Iya mansutka jaku nya rambau bejadi LONGi(Kuching) Sdn Bhd di Taman Teknologi Tinggi Sama Jaya pagi tadi.

    Enti konsep nya mujur, iya pechaya teknologi nya deka ngaga ubah ba ekonomi nengeri.

    Ketegal nya Abang Johari ngarap LONGi ulih nangkup pinta nyendia ‘Floating Solar’ ngambi ulih sama bela ngemansutka kuasa.

    Kelimpah HEP Bakun, Sarawak mega bisi HEP Batang Ai, Murum enggau Baleh ke benung digaga.

    Ngenang kaul bukai, iya madah perintah nengeri keran deka numbuhka ‘Free Trade Zone’ di Palan Penerebai Bilun Antarabangsa Kuching(KIA).

    Iya pechaya palan nya ila deka ngemudah atur mindahka produk lalu ngangkatka industri dagang di nengeri tu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: