Masing mujur bejadika Program Latih Pengelandik Baleh, SEB - Berita Iban Online

Header Ads

  • Baru Nyadi

    Masing mujur bejadika Program Latih Pengelandik Baleh, SEB

    TEPA: Jiwari Abdullah nyuaka tepa ngagai Masing.
    KAPIT: Sapit Kepala Menteri Sarawak Tan Sri Datuk Amar Dr James Jemut Masing udah bejadika Pengawa Ngelanchar Program Latih Pengelandik Baleh, Sarawak Energy Berhad (SEB) di sebuah hotel ditu, lemai Hari Lima tu tadi. 

    Masing meri terima kasih ngagai SEB ti bejalaika Tanggungpengawa Rama Korporat (CSR) sida ngatur Program Latih Pengelandik Baleh. 

    Ku iya, dalam bulan Oktober tu Tekat Ai Hidro Baleh deka berengkah digaga.  Ku iya, kelimpah ari projek besai Tekat Ai Baleh, projek pemansang besai ke bukai baka 84.6 km Jalai Kapit/Song/Kanowit beungkus RM757 juta nyauka tembu kelimpah dua pakej 9.6 km ari Temalat ngagai Nanga Ngemah sereta Ngungun By-pass 4.6 km udah ditinda lalu dipelaba tembu datai ba taun 2021. 

    Pengudah nya, menua Kapit badu nyadi pulau di Borneo laban udah disambung nengah jalai ngagai semua nengeri. Raban kunteriktor udah diberi timpuh dua taun lapan bulan nembiak kereja sida. 

    “Anang pechayaka penerang ba media rama ti madahka jalai enda tembu. salah amat pengawa ngerembaika penerang bula. 

    “Raban kunteriktor udah diberi timpuh nembuka kereja sida, lalu sida udah berengkah gawa. 

    “Enti sema sida puntan nembuka pengawa dalam timpuh diberi, sida deka kena tinggang ukum. Pagi tu tadi, aku udah terebai ari Temalat ngagai Ngungun. 

    “Jalai Kapit/Song, raban kunteriktor madahka aku jalai nya deka tembu dalam bulan Julai tu. Besabar, tiga taun pengelama, kita deriba ari Kapit ngagai Sibu. 

    “Lebih 50 taun nadai jalai, diatu, dalam timpuh tiga taun kita ulih deriba ngagai Sibu. Jalai beungkus RM 1.2 biliun, sepanjai 73 km Jalai Nanga Mujong ngagai Tekai Ai Baleh. 

    “Jalai Jiwa Murnia ari Nanga Mujong/Oyan ngagai Nanga Merit benung digaga. Pia mega jalai ngagai Tunoh. 

    “Bisi perambu deka ngaga jalai. Jalai ngagai tanah deka diperimba ungkup betanam betupi dagang besai dikena nyungkak penatai pemisi enggau ngangkatka tikas idup peranak menua pesisir enggau sida ti bempu tanah,” ku Masing.  

    Nangkan nya, pengawa ngaga jalai tu deka nyedia mayuh pengawa puang enggau dagang ngagai peranak di Baleh, nya kebuah iya ngelalau sida anang semina diau diri aja, tang patut chakah ngerebut awak ti dibai ari pengawa ngaga Tekat Ai Baleh. 

    “Pengawa ngaga Tekat Ai Baleh nyediaka awak besai ngagai bala pedagang.  Sida ti ngempu tanah tau mansutka bekal sayur, buah tauka jelu tupi baka manuk ngagai sida ke gawa,” ku Masing. 

    Iya meri terima kasih ngagai SEB ti udah ngaul peranak dia rejista diri ngulu Program Latih Pengelandik Baleh dikena nyikap sida enggau pengelandik sereta setipikit bekerejasa enggau SEB. 

    Iya ngarapka pengawa tu deka ngurangka penyampau tubuh peranak Baleh mindah gawa ke mengeri kelebih agi bala nembiak.  Ku iya, ari ngembuan pengelandik, penau enggau setipikit bekaul, sida ulih gawa enggau SEB, lalu iya ngarapka kunteriktor di menua nya ngerebut awak tu.

    “Tekat Ai Baleh nyadi tekat ai keempat digaga di Sarawak. Keterubah, dientudika Batang Ai, Bakun enggau Murum. Aku udah ngaul diri ba kesemua pengawa ba tekat ai tu. Diatu tekat ai keempat mega aku bisi ngaul diri. 

    “Batang Ai, Bakun enggau Murum, ukai baka ke udah, program CSR SEB sekali tu ngangauka peranak menua dilatih diambi gawa ba tekat ai. 

    “Kitai bisi mayuh sida ke landik deriba pilak, lipan, lori, mekanik tauka welder tang nadai ngembuan setipikit. 

    “Kompeni luar enda ngambi sebarang pekereja ti nadai setipikit. Nadai setipikit, enti sema penusah enda disadang nyadi, enda ulih minta bayar insuran.

     “Nama kebuah tiga tekat ai ke bukai SEB nadai ngembuan program CSR baka dikembuan kitai diatu, laban kitai setujuka tekat ai tu digaga.

    “Kitai bekerejasama enggau gawa begulai. SEB ngatur program latih ngambika sida ti bisi ati gawa enggau sida ngembuan setipikit. Ari setipikit tu sida ulih ba sebarang alai. Setipikit tu beguna amat. Tu pemanah pengawa udah digaga SEB ungkup peranak Baleh. 

    “Setipikit enggau latih pengelandik dulu agi ari Tekat Ai Baleh. Bala kita ulih gawa enggau sebarang kompeni di serata dunya. Ba pengawa ngaga Tekat Ai Baleh enda kurang ari 3500 iku pekereja deka datai gawa,” ku Masing nerang.

    Masing nyemetak madah tagit SEB, 500 iku raban nembiak datai ngulu 11 bengkah kus disedia – pengawa ngintu enggau operasyen injin, scaffolder and inspector, abseiling/working at heights, welder and NDT inspector, metal blaster, rigging and slinging, deriba entukar besai (lisin E enggau GDL), deriba lipan, excavator enggau roller operator, electrical enggau mechanical engineering, pengatur pengawa enggau ngatur pekereja tikas 2 (enam bulan) sereta pengawa dagang. 

    Tekat Ai Baleh bisi tagit tembu dalam taun 2025, projek tu udah dilangkar nyadi projek infrastruktur pemadu besai di Sarawak lalu deka nambahka 1285MW (megawatts) kuasa karan ulih dikena baru ngagai grid nengeri. 

    Tekat ai semin bekerangan (CRFD) di Batang Baleh, urung 95 km ari pati sungai iya enggau Batang Rajang di Bagi Menua Kapit. Nadai genturung pendiau kena bungkur projek pemansang tu. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads