Header Ads

  • Berita Tebaru

    Orang bekebun mit sawit meseti ngembuan Setipikit 'Malaysian Sustainable Oil' ba taun 2020

    Gambar Pengias: Buah Sawit mansau

    BAU: Opis Menteri Betanam Betupi nengah MPOB enggau MPOA netapka orang bekebun mit sawit meseti ngembuan Setipikit 'Malaysian Sustainable Oil' (MSPO) sebedau 1 Januari 2020.

    Sapit Menteri Betanam Betupi enggau Asas Tani Datuk Anthony Nogeh madah setipikit nya deka nentuka minyak sawit dikeluar enggau meruan sereta nitihka stindit ditetap.

    "Setipikit MSPO deka nentuka kitai ngeluar minyak sawit ke bekualiti ke alai produk tu deka dikelaku ke menua luar.

    "Ketegal produk tu dijual di menua luar kitai meseti nitihka stindit ke udah ditetap", ku iya.

    Nogeh mansutka jaku nya rambau nutup program nerenak peremeti sentang guna ngembuan MSPO ngagai orang bekebun mit sawit dalam kandang ngelingi Bau di Dewan Suarah Bau Seharitu.

    Nitihka penetap nya nyadi seiti atur ke berat ku Nogeh kelebih agi enti produk nya diguna ba pemakai.

    Ku iya, pengelikun ba pemakai nyadi sebengkah pekara ke dikemerat.

    "Kitai deka nentuka pemakai ke bisi nguna produk sawit enda ngeruga pengerai", ku Nogeh.

    Nambahka nya, iya madah Setipikit MSPO deka ngembing orang pekebun mit ngintu pemanah rampa menua.

    Kelimpah ari nya, setipikit nyaup nentuka asil sawit meruan ba rega ke manah sereta patut, ku iya. #UtusanBorneo

    No comments

    Post Top Ad