Peranak Kampung Empila, Pangkalan Kuap enggau Tanjung Parang nerima surat pala tanah
Cari Berita

Advertisement

Peranak Kampung Empila, Pangkalan Kuap enggau Tanjung Parang nerima surat pala tanah

Chief Editor | Berita Iban MY
April 30, 2018

Awang Tengah nyuaka surat pala tanah ngagai seiku penerima sehari tu.

KOTA SAMARAHAN: Penyampau 428 surat pala tanah ke dikeluar nengah Seksyen 18 Kod Tanah Sarawak ungkup kampung tradisyenal disua ngagai 398 iku penerima ari Kampung Empila enggau Kampung Pangkalan Kuap ditu.

Diatur di Dewan Suarah Samarahan sehari tu, pengawa dikemujur Sapit Kepala Menteri Datuk Amar Awang Tengah Ali Hasan.

Kelimpah ari nya, Awang Tengah ba pengerami nya bisi mega nyuaka 14 iti surat pala tanah ke dikeluar nengah seksyen ke sama ngagai 14 iku orang empu tanah adat bansa asal (NCR) ari kandang endur Tanjung Parang.

"Pengawa tu nyadi sebengkah inisiatif perintah nyamin tanah kita ke alai perintah sigi komited ngemujur program nyukat tanah rayat.

"Ungkup tanah NCR ke sigi hak rayat, kitai sigi deka nyukat lalu dikeluar pala tanah,"ku Awang Tengah.

Iya ke mega Menteri Pemansang Industri enggau Dagang nambah, pengawa nyukat tanah kampung tradisyenal sigi udah lama dikereja lalu deka digaga belama.

Ku iya, naka ke diatu udah mayuh tanah kampung tradisyenal disukat lalu beribu surat pala tanah udah dikeluar.

"Kitai deka majakka pengawa tu, genturung pendiau ke bedau disukat dikearap ulih meri kereja sama begulai enggau Opis Tanah enggau Penyukat sereta pengari rayat," ku iya.

Nitihka penerang Awang Tengah, penerima surat pala tanah  enda ibuh mayar premium tanah, chukai tanah sereta bayar bukai ke bekait.

Kelimpah ari nya, surat pala tanah tu deka nentuka tanah nya sigi hak orang bempu tanah lalu enda tau dirampas sengapa, tandu Awang Tengah. #UtusanBorneo