Peti kad klinik deka dikena di KK Miri berengkah bulan Mei - Berita Iban Online

Header Ads

  • Baru Nyadi

    Peti kad klinik deka dikena di KK Miri berengkah bulan Mei

    NGEMUDAHKA MENSIA MAYUH: Datuk Sebastian mendingka penerang ari Ling pasal peti kad klinik lebuh pejalai ngabas Klinik Pengerai Miri, kemari.
    MIRI: Pengawa ngena peti kad klinik deka dipejalai di Klinik Pengerai (KK) Miri berengkah ari bulan baru nukar sistem gintir lumur pesakit.

    Kaban Kunsil Nengeri (ADUN) Piasau, Datuk Sebastian Ting madah bisi sepuluh peti deka diengkah di klinik udah dikelai ungkup penerang sida ke sakit.

    Lima peti dikelai diabetes, ngambi darah, darah tinggi, ke bukai enggau farmasi bela bisi dua peti.

    “Sida ke sakit semina ngengkahka surat ubat disempulang kad klinik ke dalam peti tu. Ari pemisi peti tu, klinik badu agi ngena sistem gintir lumur,” ku iya nerang.

    Ku Ting, pejalai sistem baru tu nyadi siti ari pengawa nguji dipejalai raban ngatur pengawa klinik ungkup sistem gintir meruan agi.

    Ku iya, sistem deka berengkah dikena 15 Mei tu lalu semina di klinik pengerai Miri aja.

    Peti deka dijaga bala staf klinik ngambi ngembing sida ke sakit sereta nentuka sistem nya bejalai lanchar. 

    “Kitai nguji sistem tu dulu ngambika nemu sekalika iya chara pemadu manah nukar gintir lumur,” ku iya nerang. 

    Ku Ting, jam nunggu nyadi lama laban penanggul gintir lumur lenyau.

    Pekara tu nyadi lebuh gintir lumur diambi kelalu tumu bala pengari sida ke sakit tang sida nadai datai.

    Jam pemadu tumu gintir lumur diambi iya nya pengudah pagar klinik dibuka urung pukul 5 pagi.

    Sida ke sakit berengkah gelumu urung pukul 6.30 pagi lalu nganti jam peresa pengerai urung pukul 7.30 pagi.

    Dipelaba bisi lebih 1000 iku sida ke sakit nerima perubat enggau beperesa pengerai di klinik maya jam gawa.

    “Kitai ngarapka sistem peti tu deka ngurangka penanggul lumur lenyau tu,” ku iya nerang baru.

    Iya sekali agi ngingatka sida ke sakit ngemai kad klinik dikena nyeliah sebarang penanggul maua sistem tu dipejalai ila.

    Berebak enggau nya, Ting ke mega Chairman SUPP Piasau madah bisi tiga televisyen enggau sebuah injin ai irup `water cooler’ ngambika diguna di klinik.

    Tu dikena nyilih tv ke rusak enggau injin ai irup ke lama.

    Sama bisi datai Ketuai Indu Misi Ling Leh Hong, Pemantu Perubat Pengerai Hermadi Talip enggau Pemantu Perubat Kanan, John Sudin. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads