Raban Kristian di Sibu Jaya deka bisi sebuah gerija Anglikan baru - Berita Iban Online | Laman Web Berita Kitai

Header Ads

  • Baru Nyadi

    Raban Kristian di Sibu Jaya deka bisi sebuah gerija Anglikan baru

    Chairman Komiti Pengawa Ngaga Gerija (CBC) Anglikan Sibu Jaya Sylvester Candy Pai.

    SIBU: Pemerat raban Kristian Anglikan di Sibu Jaya deka ngembuan gerija baru deka dijapai lebuh pekara nya matak ati Pegawai Khas ngagai Menteri Besai Datuk Paduka Mohammad Yusof.

    Chairman Komiti Pengawa Ngaga Gerija (CBC) Anglikan Sibu Jaya Sylvester Candy Pai udah nyerahka profail sereta penerang ke silik pasal gerija nya ngagai Mohammad ba atur pengawa Makai Lemai Amal St John’s Extension Centre (SJEC) Anglican Church, Sibu Jaya di sebuah restoren ditu, kemari.

    “Aku deka ngenataika peminta kita tu ngagai Putrajaya ngambika ulih diperundingka kena ngulihka geran perintah tauka barang gaya bantu ngamatka pengawa ngaga gerija baru ke kita.

    “Nyerumba menua kitai tu sebuah menua ke ngembuan mayuh macham pupu raban bansa, udah nyadi tanggungpengawa Perintah nyendiaka palan endur besembiang ke rayat,” ku iya.

    Atur pengawa nya kemari dipunka ulih Ketuai Pegawai Eksekutif Kolej ITA Dato Seri Diraja Dr Benny Lee.

    Sama bisi enggau ngulu atur pengawa nya, Chairman SJEC Basa Gali sereta raban ari gerija bukai.

    Atur pengawa makai lemai nya digaga, ngambika ulih alai ngumpul wang turu SJEC kena ngaga sebuah gerija baru Anglika di Sibu Jaya.

    Ba atur pengawa nya mega, Dr Benny bisi nyuaka pemeri ari iya empu, RM2,000 ngagai wang turu SJEC.

    Dalam jaku iya, Dr Benny ngelalau bala pengundi di Sibu Jaya bejalaika tanggungpengawa sida nyadi rayat Malaysia netapka sapa ke patut megai Perintah maya Pengawa Bepilih Besai ke-14 (PRU14) tu ila.

    “Pilih enggau pengelandik kitai, ke pemujur menua tu dudi hari datai ke jemah ila.

    “Ke batang, kitai patut ngembuan pemesai ke sigi ulih merintah sereta nyaga menua tu kelimpah ari majakka pengawa ngemansangka menua tu.

    Sylvester meri puji ke penatai Mohammad ke ulih sama enggau ngulu atur pengawa nya, alai Mohamad dikangau sereta dibai ulih Dr Benny.

    “Kami enda ngadang penatai iya ngagai pengawa mit kami bansa tu lalu ngipak endar mega, penatai iya enggau ngulu pengawa kami, laban kami sigi begunaka sebuah gerija di Sibu Jaya.

    “Kami ngarapka peminta kami tu deka diterima ulih Menteri Besai Datuk Seri Mohd Najib Tun Razak,” ku iya.

    Iya nandu baru madahka SJEC di Sibu ditumbuhka ari taun 2006 lalu kediatu sida iya agi nyuwa endur ba rumah kedai kena bejalaika pengawa pengarap. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads