Header Ads

  • Berita Tebaru

    Randau enggau pengemeran industri minyak enggau gis diatur Mei

    Abang Johari
    KUCHING: Perintah Nengeri deka ngatur randau enggau semua pengemeran industri minyak enggau gis nyengkaum Petroliam Nasional Berhad (Petronas) tengan bulan Mei.

    Kepala Menteri, Datuk Patinggi Abang Johari Tun Openg madahka nya dikena ngenukuka polisi baru ti dipejalaika perintah nengeri bejalai enggau lanchar.

    "Opis aku di baruh Unit Minyak enggau Gis deka ngatur randau enggau semua pengemeran industri nyengkaum Petronas ti deka diatur tengan bulan baru, lalu ke udah ditetapka sebedau bulan Ramadan.

    "Sesi randau tu deka nerangka, keterubah, pasal undang-undang enggau atur ngambika ulih nitihka Oil Mining Ordinance (OMO), Gas Distribution Ordinance (GDO), Land Code and Natural Resources and Environment Ordinance (NREO).

    "Kedua, pasal penalti enggau nama ti deka dipejalaika nyema enda nitihka atur, lalu ketiga bekaul pekara ke patut dititihka nengah Buku Panduan ti diterangka ngagai pengemeran industri sereta undang-undang berkanun enggau atur ti bekaul," ku iya mansutka pekara nya lebuh bejaku seraya bejadika pengawa Sign Land Lease Agreement entara Bintulu Supply Base (BSB) enggau Bintulu Port Authority (BPA) ke diatur ba sebengkah hotel ditu, seharitu.

    Dalam aum pengarang berita, Abang Johari madahka bisi udah peminta bekaul enggau lisin tang chara deka minta lisin mega diterangka nengah randau nya nya tengan bulan baru.

    Semua kompeni minyak enggau gis ti bejalai ditu enda tau enda bisi lisin ti dikeluarka perintah nengeri nengah OMO Sarawak, laban ti ngemendarka bejalaika operasi ba nengeri tu iya nya Sarawak.

    Pengudah randau tu ila semua pengemeran industri baka kontraktor, sub-kontraktor tauka vendor enda tau enda minta lisin nitihka atur OMO, ku iya. #UtusanBorneo

    No comments

    Post Top Ad