Rintai chalun SUPP deka dibantai enda lama agi - Berita Iban Online

Header Ads

  • Baru Nyadi

    Rintai chalun SUPP deka dibantai enda lama agi

    Dr Sim
    KUCHING: Nama tujuh chalun Parti Sa’ati Rayat Sarawak (SUPP) ke deka bediri maya Pengawa Bepilih Besai Menua ke-14 (PRU14) deka dipadah dalam kandang berapa hari tu ila, ku presiden parti Datuk Dr. Sim Kui Hian.

    Dr.Sim madah munyi nya lebuh ngepunka atur pengawa renggat menua, ‘2018 World Hearing Day’ ti digaga ba sebuah pasaraya ditu, bedau lama tu tadi,  bedau deka madah sapa chalun ari SUPP ke deka bediri nya.

    “Dalam kandang berapa hari tu ila, baru kita nemu. Sebedau hari ngantung nama, kita deka nemu sapa chalun nya,” ku iya, ke enggai nyaut enti iya entara chalun ke deka bediri ba sitak Stampin.

    Ba jaku iya ngepunka atur pengawa nya kemari, iya madah kena 9 Mei tu ila, iya nya PRU14 siti peluang emas ke rayat Sarawak bediri tegut ngambika bisi nyawa ke inggar agi ke ulih didinga di Putrajaya.

    “Kitai deka BN Sarawak ngembuan penuduk ke manah. Kita deka Perintah Besai datai kitu ngagai Sarawak, ukai Sarawak kin,” ku Dr. Sim, ti mega nyadi Menteri Opis Kandang Menua enggau Pengawa Berumah.

    Iya nandu baru madahka, Sarawak begulai enggau Sabah sereta Tanah Melayu udah ngempung penyerakup Malaysia dalam taun 1963 - lalu kededua sitak menua di timur tu digaga enda sama asi dalam sukut pemansang enggau ungkup, enda baka ke di Semenanjung Malaysia.

    “Taun siti nyin tadi, Petronas teulihka penguntung beresi dalam penyampau RM45 billion. Ari penguntung nya, 30 persin tauka RM13.5 billion datai ari Sarawak. Taja pia, kitai agi nyangkut ba renggat lima persin (royalti),”ku Dr. Sim.

    Bekait enggau pekara tu, Perintah Menua ku iya, deka ngambi hak kitai pulai baru, ke nyadi palan ke menua tu ngulihka pemisi kena ngemansangka menua tu lalu ngemanahka agi pengelantang pendiau mensia mayuh.

    “Kitai deka duit kitai pulai baru. Enggau pemisi nya, kitai ulih ngena duit nya ngemansangka menua tu, ke dikunsi enggau 3 jura mensia mayuh rayat Sarawak di menua tu, lalu kitai enda ibuh bekunsika 30 juta enggau rayat Malaysia bukai,” ku Dr. Sim.

    Iya nandu baru madahka nama kebuah Sarawak enda patut bekunsika pemisi lebuh mayuh ari perengka guna baka sepital, sekula tauka jalai manah agi di Semenanjung Malaysia dibanding enggau Sarawak.

    “Nya alai, 9 Mei tu ila,peluang kitai, aku sigi enggai agi nganti peluang dalam kandang 55 taun tu ila mutarka pekara tu,” ku Dr. Sim. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads