Header Ads

  • Berita Tebaru

    Salang pechaya isu tanah NCR dikena bekimpin maya PRU14

    Salang
    JULAU: Sekretari Besai Parti Rayat Sarawak (PRS) Datuk Joseph Salang pechaya isu Tanah Adat Bumiputera (NCR) mengkang dikena maya bekimpin beserimbai enggau Pengawa Bepilih Besai Ke-14 (PRU14) ti deka datai.

    Taja pan baka nya ku iya, iya ngarapka rayat enda tepawah runding enggau jaku ke diberi penyakal ngagai perintah bekaul enggau isu nya.

    “Kebuah pia laban ubah ti digaga ba Kanun Tanah Negeri deka dibantai maya Aum Kunsil Nengeri bulan Julai enda lama agi.

    “Ubah tu deka bisi definisi enggau skop ti nyemetak ba isu Pulau Galau enggau Pemakai Menua (PGPM),” pia ku iya madah maya pengerami begulai enggau mensia mayuh di Rumah Ubat Ego, Nanga Serau ditu, kemari.

    Ba pengerami tu iya bela bejadi projek karan rumah panjai nya.

    Salang mega madahka iya bela siku ari komiti ti ngatur isu PGPM begulai enggau pemesai sereta raban profesional ke bukai.

    “Kitai endang ngemeratka hak bansa bekaul enggau NCR tu,” ku iya madah baru.

    Ku iya, definisi PGPM enda lama agi deka ditukuka laban iya madah, rayat ukai minta tanah tang minta perintah ngenukuka tanah sida ti kebendar iya endang tanah sida ari kelia.

    Ba pekara politik, Salang madah, chalun ngatika diri endang nadai jalai deka diterima parti dalam Barisan Nasional (BN) taja sida nya menang.

    “Kebuah pia laban sebedau diterima semua komponen parti BN meseti besetuju magang nerima sida.

    “Tang enti siti ari komponen parti enda besetuju, sida tu enda ulih nyadi kaban dalam BN,” ku iya nerang.

    Sebedau tu ku iya, Larry Sng Wei Shien ti bisi ati deka ngelaban iya bediri ba Parlimen Julau madahka diri deka diterima BN enti menang ba PRU tu.

    Salang madah, ulah Larry nya semina nyadika chara dikena melitik penemu rayat ba Parlimen Julau.

    Berebak enggau tu, iya ngelalau bala pengundi ba parlimen nya ngambika enda salah undi dikena nyeliahka diri ari ke ditinggal pemansang ke dibai perintah.

    “Menua Julau enggau Pakan ti ba sitak Sarikei sebagi ari menua ke dibungkur ba projek betanam betupi betikas besai ke digelar Sadok Agropolitan.

    “Projek tu deka ngubah sitak Sarikei enggau Betong nyadi sitak ti ngeluarka pemakai pemadu besai di Sarawak ila,” ku iya nerang.

    Projek tu ku iya deka nejuka pemansang ke bukai datai nyengkaum baka projek jalai alun.

    “Berindik ari nya, anang ngelengka ke awak tu lalu mengkang nyukung chalun ke tau nyadi pengari rayat ngambika BN mujur nandu pengawa nyadi perintah udah tu ila,” pia ku iya.

    Nangkan ruman panjai nya, Salang mega ngulu pengerami ke sebaka di Rumah Dinggai Enturan enggau Rumah Lila Sabai di Pakan.

    Di Rumah Lila iya bisi nerima pom nyadi raban PRS sereta dipebasa bejadi projek ai beresi rumah panjai nya. #UtusanBorneo

    No comments

    Post Top Ad