Header Ads

  • Berita Tebaru

    Saratok deka nyadi palan endur ngatur program Sejiwa Senada

    MIRI: Saratok deka nyadi tuai pengatur program Sejiwa Senada nangkanka tu pengudah program nya mujur diatur di Miri. 

    Di Saratok, program tu deka diatur ba Dataran Bandar Saratok berengkah ari 21 ngagai 22 April, meri peluang ngagai peranak ngelingi Saratok, Debak, Sarikei, Betong, Sri Aman enggau kandang menua besemak bukai bisi awak ngasaika servis perintah, penerang enggau lalau nyengkaum kompeni bekaul perintah (GLC), gerempung ukai dikuasa perintah (NGO) enggau sektor peribit.

    Penerang ari Unit Kaul Mensia Mayuh enggau Protokol Nengeri kemari, madahka bisi 100 bansal deka nyendiaka mayuh bengkah servis perintah, penyanding penemu, pengawa mandang, pengawa bejualka produk menua nya, ai irup enggau pemakai, panggau pemerindang sereta chabut tikit benasit ngagai bala ke datai.

    Program Sejiwa Senada ba penerang madahka nya siti ari inisiatif perintah nengeri ngaul diri ngenyemakka diri enggau rayat nengah chara ngaul renggat baruh seraya ngemeranka rambai jaku ‘Perintah enggau Rayat’.

    Edisyen Saratok dipelaba deka dipenyadi Kepala Menteri Datuk Patinggi Abang Johari Tun Openg kena pagi 21 April.

    Bala ke datai ngagai program nya mega deka bisi peluang menang kerita Perodua Axiata, dua buah mutosikal enggau mayuh produk elekterik.

    Mensia mayuh patut anang muai peluang meda semak agi pengawa ke udah digaga perintah nengeri ungkup rayat, berami, beperindang lalu engka bisi peluang pulai mai kerita tauka perais manah ke bukai.

    Batang tuju program tu dikena nempa siti palan ungkup perintah ngaul diri sereta gawaka rayat seraya meransang rayat ngaul diri dalam lumba enggau aktiviti rekreasyen.

    Bala ke datai patut nguji nyepi mayuh bansa pemakai bisi dinah ba Dapur Sarawak lalu deka diperindang raban penanyi tebilang baka Jay Jay, Bob AF, Ricky Andrewson enggau mayuh ke bukai.

    Kelimpah ari nya, program tu mega ngarapka ulih ngerapitka agi kaul enggau kerejasama antara rayat dikena nentuka pengelikun enggau pengelantang enda pungkang sereta mega nengeri seruran mansang. #UtusanBorneo

    No comments

    Post Top Ad