Sarawak mayuh pemansang sekumbang Najib nyadi PM - Berita Iban Online

Header Ads

  • Baru Nyadi

    Sarawak mayuh pemansang sekumbang Najib nyadi PM

    Datuk Amar Douglas Uggah Embas
    BETONG: Mayuh macham pemansang udah dibai perintah ngagai Sarawak sekumbang  Datuk Najib Razak mangku pengawa nyadi Menteri Besai (PM) Malaysia.

    Sapit Kepala Menteri Datuk Amar Douglas Uggah Embas madah kenyau ari Najib megai perintah, iya udah suah datai ngabas Sarawak lebih 165 kali lalu mai pemansang ngagai nengeri tu.

    “Kitai nyukung tegut Barisan Nasional (BN) menang maya Pengawa Bepilih Besai Ke-14 (PRU14) lalu ngetanka Najib nyadi chalun PM Malaysia,” ku iya.

    Iya mansutka jaku nya lebuh Pengawa Ngelanchar begulai enggau Raban Gawa Pengawa Bepilih BN PRU14 Zon 5 enggau P204 ti diatur di Balai Lumba Tan Sri Datuk Amar Stephen Kalong Ningkan Betong ditu, kemari.

    Ku iya, penyerakup ke bisi di nengeri tu asil dibai bala ketuai BN ti puh gawa negika penyerakup rayat enggau pemansang.

    “Bisi chalun ti deka ngena isu raban bansa nginti sukung pengundi nyenggala deka mambarka penyerakup udah lama bisi.

    “Berebak enggau nya, rayat patut sedarka penuduk sida semina ngerichahka pengawa bepilih lalu ngangkatka nama diri aja,” ku iya.

    “Nya kebuah nyadi raban gawaka parti kitai patut gawa ngetanka BN menang besai lalu gawa begulai ngambi ati rayat enggau semangat penyerakup ti teguh.

    “Raban gawaka parti ari raban nembiak, indu enggau sida ke lelaki patut sikar sereta gawa negika parti tang anang sesekali kasar ulah enggau ngaga penyarut laban tu ukai chara kitai,” ku iya nangkan.

    “Sida mega meseti nentuka raban ti dilaban datai ari luar ngambi nitihka undang-undang nengeri tu enggau mutar memanah enti sida nguji ngaga penyarut. Kebuah pia laban chara dikemeran sida enda sama enggau pengawa dikemeranka kitai,” ku iya madah nyemetak.

    Beserimbai enggau pengawa nya, Uggah mega bisi nyuaka tambai BN kelai bejadika pengawa ngelanchar ngagai 11 DUN ti ngarika DUN Balai Ringin, Bukit Begunan, Simanggang, Engkilili, Batang Ai, Saribas, Layar, Bukit Saban, Kalaka, Krian enggau Kabong.

    Sama bisi datai Menteri Bekal Ai enggau Elekterik Menua Pesisir Sarawak, Dato’ Sri Dr Stephen Rundi Utom, ADUN Layar, Gerald Rentap Jabu, Penyanding Penemu Pemansik Sains Nengeri Sarawak, Datuk Patinggi Tan Sri Alfred Jabu Numpang, Tan Sri Dato Sri Empiang Jabu,  ADUN Saribas, Razi Sitam, ADUN Kabong, Chee Kadir, ex-ADUN Bukit Saban, Robert Lawson Chuat, Sekretari Politik, bala ketuai pampang, opis enggau bala komuniti. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads