Sarawak udah ngemendar RM46.3 bilion FDI dalam timpuh lima taun - Berita Iban Online

Header Ads

  • Baru Nyadi

    Sarawak udah ngemendar RM46.3 bilion FDI dalam timpuh lima taun

    Datuk Amar Awang Tengah Ali Hassan
    KUCHING: Dalam timpuh lima taun tu, Sarawak udah ngemendar RM46.3 bilion puku ari menua luar (FDI) diperanak ba pengawa industri, ku Sapit Kepala Menteri Datuk Amar Awang Tengah Ali Hassan.

    Iya ke mega Menteri Pemansang Industri enggau Pekara Dagang madah penyampau nya enda nyengkaum perambu puku USD3 bilion ba projek besi enggau USD2 bilion ba projek methanol.

    “Menua China ke nyadi kuasa ekonomi lumur dua di dunya nyadi menua ke pemadu mayuh beranakka puku ditu.

    ‘Ketegal nya kitai deka terus matak pemeranak puku ari menua luar kelebih agi ari China. Kelimpah nya, kitai mega meransang pemeranak puku ari dalam menua,’ku iya.

    Awang Tengah mansutka jaku nya ba pengerami bejadi LONGi (Kuching) Sdn Bhd di Taman Teknologi Tinggi Sama Jaya ke dikemujur Kepala Menteri Datuk Patinggi Abang Johari Tun Openg.

    Bejaku ngenang LONGi (Kuching) Sdn Bhd ti ngepunka operasyen ba taun 2016, iya madah produk asil kilang LONGi di Kuching dijual ngagai menua di Eropah, Amerika sereta Kanada.

    Penyampau ekspot nya, ku Awang Tengah ke mega Menteri Pemansang Kandang Menua enggau Pengeraja Asal deka manggai RM1.5 biliun ba taun 2018.

    LONGi (Kuching) Sdn Bhd sebuah kompeni ari menua China ti mansutka ‘Mono Crystalline silicon ingots, wafers, cell enggau modules’.

    ‘LONGi ngaji 2,130 iku pengereja pengawa nyengkaum 247 iku injinir.

    “Urung 99 peratus ari pengereja pengawa nya ngarika peranak Sarawak nyengkaum CEO ke mega peranak Sarawak.

    “Tu mandangka peranak Sarawak ulih nangkup pengawa lalu LONGi disadang nambahka penyampau pengereja pengawa manggai 2,851 iku ba pengujung taun tu,’ku iya seraya madah 120 iku udah dianjung belatih di China.

    Iya madah penyampau puku ke diperanak semua kompeni ke ngaga operasyen di Sama Jaya udah ngelui RM12 bilion, lalu dalam taun 2017 semua kompeni nya ngeluarka RM380 juta dikena mayar gaji pengereja pengawa.

    Semua tu muka peluang ekonomi ngagai peranak ke diau ngelingi baka ke pinta bekal pemakai, rumah,perengka pengangkut sereta ke bukai, tandu Awang Tengah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads