Header Ads

  • Berita Tebaru

    SRDC udah bejadika kimpin ‘Hari Tanpa Beg Plastik’

    NGARAPKA MUJUR: Sempurai (kanan) bejadika kimpin Hari Tanpa Beg Plastik di Sibu Jaya.
    SIBU: Opis Kaunsil Menua Pesisir Sibu (SRDC) udah bejadika kimpin ‘Hari Tanpa Beg Plastik’ ba menua ke dipegai sida.

    Pengawa bejadika kimpin nya diatur ba sebengkah palan bebelika barang di Sibu Jaya ti dipenyadi Chairman SRDC Sempurai Petrus Ngelai, kilah ensana.

    Sempurai ba jaku iya madah, kimpin nya digaga ngambika ulih nyadika lalau ngagai mensia mayuh mai beg diri empu dikena ngurangka agi ngena plastik.

    “Plastik tusah deka lela dalam tanah tauka bekenaka beratus taun sebedau anchur.

    “Nya alai, tu nejuka tanah kelalu balat asid lalu enda engkeman alai betanam kelimpah ngenataika penusah bukai.

    “Enti dibuai sengapa baka dibuai dalam parit enggau sungai dia menua ke besemak tau ampuh bah laban plastik tu deka nekat ai maya ujan bangat.

    Sempurai madah, kimpin ke sebaka endang udah dipenyadi ba endur bukai baka di nengeri Pulau Pinang enggau Selangor.

    “Tang taja pan baka nya, kimpin tu semina ulih mujur enti semua piak bekerejasama nyengkaum orang ke beempu kedai,” pia ku iya madah baru.

    Nambahka nya ku iya, enti jarang bekenaka plastik dia penyampau uras mega deka dikurangka agi.

    “Tu tau ngenyadika agi pemesai endur kitai nugungka uras,” ku iya madah.

    Bela datai maya tu iya nya sapit chairman SRDC Kaunsilor Robert Lau Hui Yew. #UtusanBorneo

    No comments

    Post Top Ad