Header Ads

  • Berita Tebaru

    SSM ngungkup RM1juta dikena ngepunka dagang

    BENASIT: Awang Tengah sereta (ari kanan) Naroden, Henry, Abdullah enggau (kiba) Zahrah begambar enggau pemenang tikit benasit ke bulih sebuah mutosikal, nyerumba pengerami bejadika Karnival ONE SSM, kemari.
    KUCHING: Orang dagang baru kelebih agi orang dagang mit enggau jelan pemesai (PKS) nengeri tu, ke baru deka ngepunka dagang ulih minta bantu geran kereban ke bisi diungkupka Opis Menteri Dagang Dalam Nengeri, Koperasi enggau Pekara Bebeli Barang (KPDNKK) nengah Suruhanjaya Syarikat Malaysia (SSM).

    Sapit Kepala Menteri ti mega Menteri Pemansang Industri enggau Orang Dagang Datuk Amar Awang Tengah Ali Hasan madah, SSM bisi ngungkupka RM1 juta ngagai Sarawak dikena mantu orang dagang baru ba nengeri tu ngepunka dagang.

    “Sehari tu baka ke disebut Datuk Henry Sum (Sapit Menteri Dagang Dalam Nengeri, Koperasi enggau Pekara Bebeli Barang), YAB Menteri Besai udah ngungkupka ngagai SSM suba RM5 juta, diatu RM10 juta bisi nambah dikena mantu orang dagang kitai ngepunka dagang sida.

    “Lalu sehari tu mega Datuk Zahrah Abdul Wahab Fenner (Ketuai Pemesai Eksekutif SSM) bisi madahka iya deka ngungkupka RM1 juta ngagai Sarawak.

    “Laban YAB Menteri Besai udah nambah RM10 juta ungkup serata Malaysia, nya alai RM1 juta nya bedau chukup (ungkup nengeri tu), minta tambah baru dikena mantu (orang dagang) ke bisi datai ditu (karnival ONE SSM) sereta mayuh agi orang dagang di menua pesisir,” ku iya.

    Awang Tengah ti mega Menteri Kedua Pemansang Mengeri enggau Pengeraja Asal mantaika pekara nya lebuh bejaku ba pengerami bejadika Karnival Online Networking Entrepreneurs (ONE) SSM ba CityOne Megamall ditu kemari.

    Iya ngarika Kepala Menteri Datuk Patinggi Abang Johari Tun Openg bejadika karnival nya.

    Ungkup belanja ke diberi ngena geran bantu dikena ngepunka dagang dikelala enggau nama SSM BizGrant, iya nya inisiatif SSM ke dibantaika Menteri Besai Datuk Seri Najib Tun Razak sepenyampau RM10 juta, ngambika bisi diagih ngagai orang dagang ke patut di serata menua.

    Nengah geran tu, orang dagang baru deka nerima bantu kereban dikena ngepunka dagang ti berega RM3,000 ke siku orang dagang.

    Orang dagang ke deka minta SSM BizGrant deka nengah proses dikerandau dulu dikena ngenukuka pematut orang dagang ke nerima nya.

    Nambahka nya ku iya, Menteri Besai mega bisi mantaika insentif bukai dikena mantu nyungkak raban orang ti ngemeranka PKS nyengkaum dagang online, ti dikearapka ulih ngerembai ngagai renggat dunya jemah ila.

    YAB Menteri Besai mega bisi nambahka belanja RM2.9 billion dikena mantu bidang PKS di serata menua nyengkaum Sarawak.

    “Tu ngayanka gaya kitai jemah ila mujur dalam pengawa dagang ti disempulang pengeran kitai empu deka mujur, laban perintah Barisan Nasional ke diiring YAB Menteri Besai besemaya deka mai pengawa dagang ti lebih meruan jemah ila,” ku Awang Tengah.

    Berebak enggau tu iya ngarapka nengah ungkup belanja ke disediaka perintah, orang dagang kelebih agi ti biak patut bisi runding positif sereta bebendar laban nadai jalai mudah dikena nyapai pemujur.

    Kitai deka meda aset pemadu berega nengeri, iya nya raban biak ulih mujur dalam mayuh bidang nyengkaum bidang ke ulih ngangkatka pengelantang, ku iya.

    Kelimpah ari nya iya madahka opis menteri pemansang industri enggau orang dagang mega bisi bejalaika sekeda inisiatif dikena nambahka kereban tauka perengkaguna PKS baka numbuhka palan inkubator, Borneo 744 ba Pending, Innovation Centre, Anjung Usahawan, estet industri di serata Sarawak enggau Sarawak Product Pavilion ba Kuala Lumpur nyengkaum Collection Centres.

    Bisi datai ba pengerami bejadika Karnival ONE SSM nya Henry Sum Agong; Menteri Muda Pemansang Orang Dagang enggau Dagang Mit enggau tengan Pemesai (PKS) Datuk Mohd Naroden Majais, Menteri Muda ba Opis Kepala Menteri (Pekaral Korporat) ti mega Kaban SSM Abdullah Saidol sereta Zahrah. #UtusanBorneo

    No comments

    Post Top Ad