Tinggal arang enggau abu aja dipeda mata - Berita Iban Online

Header Ads

  • Baru Nyadi

    Tinggal arang enggau abu aja dipeda mata

    KASIH AMAI: Abis lengis dempa api.

    SIBU: Urung 363 iku peranak rumah Lorre Lebah, pemanjai 39 pintu di Nanga Ibau, Kapit abis lengis diempa api urung jam 7.30 lemai kemari. Semina tinggal arang enggau abu aja dipeda.

    Nitihka penerang ke diterima Berita Iban ari peranak menua nya empu, penusah angus tu nyadi bepun ari injin api ka bisi penanggul (masalah teknikal).

    Taja pia, nadai penusah bebadi diripotka ba palan penusah ke nyadi.

    Kediatu, kesemua peranak menua nya udah mindah tauka numpang diau ba diri sebala kesemak.

    Pengudah raban kami nerima penerang pasal penusah angus nya, siku ari raban kami tetemuka serabana Arry Sullivan II nulis status ba Facebook iya (peranak menua nya) ti ngasuh ati kami berasai kasih sereta sinu amat ngagai bala ke napi penusah angus nya. Tu artikelka dipansutka Arry ba Facebook iya:

    "Nama penyadi kenu ku jaku ka pulai Gawai ngerami rumah panjai bulan 5 tu ila, sekali abis rumah panjai kami Nanga Ibau (Kapit) diempa api lemai tu tadi."

    "Nama penguji besai amai diberi nuan ngagai kami semua taun tu Apai.

    "Abis lenyau ruang bilik bala aki ini kami ba din, abis lenyau pengingat ba dilekat ba ruang bilik, abis lenyau empa api semua bala jajau lama, gong, engkerumung, bendai, tawak lesi laban api.

    "Dini meh endur aki enggau ini kami ka diau udah tu ila, nya aja utai ka bisi pemaie sida iya dipeda kami bala uchu ichit wit, diatu udah nadai agi diempa api ti Ransi.

    "Baru udah tembu rumah diadu enggau ngangkatmanah deka ngerami gawai, sekali dituntung penusah angus saritu.

    "Tinggal arang enggau abu aja dipeda mata, ketegal api ti ransi.. Nadai agi utai dipeda lebuh pulai ke menua.. Nadai agi pengingat begulai enggau bala semua.. Besai amat penguji diberi nuan ngagai kami serumah Apai ke bekuasa." ku Arry mantaika penyinu ati enggau penyayau iya ke rumah panjai nya.

    Nyau enda berasai basah mua (nyabak) Admin maya macha sereta ngenang bala ke napi penusah angus nya.

    Berebak enggau tu, aram meh kitai semua sama bela bersampika bala benung tasah nya awakka Tuhan ngeringka semengat sida iya dalam nempuh penusah ka nyadi tu.

    Nuju bala bisi ti ati deka mantu tauka meri pemeri ngagai peranak menua tu tau nitihka penerang ba gambar baruh tu:

    Berita enggau gambar sentang artikel tu mega bisi dipansutka raban kami ba Facebook Pages *Berita Iban Online*, ulih dibacha nuan ba 'DITU'.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads