Header Ads

  • Berita Tebaru

    Ulah mayuh macha mantu ngelala pengamat penerang ba media rama

    Laman Web berita Kitai
    GAMBAR PENGIAS: "Laman Web Berita Kitai" @ BeritaIban.com

    KUCHING: Ulah ti mayuh macha deka mantu diri empu ngelala pengamat penerang ti ditabur nengah media rama.

    Kepala Menteri Datuk Patinggi Abang Johari Tun Openg madah pengawa naburka berita pelesu nyadi pemar besai ditapi di media rama.

    “Pemar ke bansa tu begunaka kitai nyerenih pengamat penerang diterima.

    “Kitai meseti bejejimat ngambika enda ditipu pengawa raban ti nadai tanggungpengawa, salah guna perengka teknologi,” ku iya rambau Program Jom Baca Bersama Untuk 10 Minit di Pustaka Negeri Sarawak ditu, lama ke udah.

    Surat jaku iya dibacha Menteri Pelajar, Sains enggau Pandik Teknologi, Dato Sri Michael Manyin Jawong.

    Nitih ku iya, nyerumba pengawa perintah bejalaika inisiatif ekonomi digital, rayat patut meretika tanggungpengawa nyadi peranak digital.

    Bejaku ngelansa program nya ku iya, ngemeranka ulah macha seruran relevan nyadi jematan dikena nguasa penemu.

    Nitih ku iya, nadai ngemeranka ulah nya, mar amat deka belajarka bemacham bidang ti majak jampat ngerembai tetiap hari.

    Nya alai iya meransang ngambika budaya macha ulih dikemeran ba pengidup.

    “Aram mih kitai bela ngemeranka budaya macha ngambika pengidup kitai deka ngembuan mayuh agi penemu sereta bisi reti.

    Abang Johari madahka bup enggau ngemeranka ulah macha enda ulih diselara, tang bisi kaul rat enggau pangan diri.

    Nadai bup ku iya, mar deka ngetanka penerang sejarah menya sereta meri pangka ngagai pengidup dudi hari.

    Program Baca Bersama Untuk 10 Minit dipejalai seretai di selampur menua sehari kemari enggau tuju nerenakka komuniti ngambika macha.

    No comments

    Post Top Ad