20,000 kayu rian diintu baru nengah Program Pemungkal Ngintu Baru Kebun Rian
Cari Berita

Advertisement

20,000 kayu rian diintu baru nengah Program Pemungkal Ngintu Baru Kebun Rian

Chief Editor | Berita Iban MY
May 2, 2018

Uggah begulai Menteri kebukai sama bela megai buah rian enggau Menteri Muda Pemansang Tanah Adat Datuk Roland Sagah (tiga ari kanan), maya pengawa Program Pemungkal Ngintu Baru Kebun Rian, seharitu.

KUCHING: Perintah nengah Opis Betanam Betupi Sarawak deka ngintu baru 20,000 kayu rian ke udah bisi serata nengeri tu nengah Program Pemungkal Ngintu Baru Kebun Rian.

Sapit Kepala Menteri ti mega Menteri Betanam Betupi Moden, Tanah Adat enggau Pemansang Kandang Menua, Datuk Amar Douglas Uggah Embas madahka program nya dipejalaika enggau kerejasama Top Fruits.

"Perintah udah ngungkupka belanja sepenyampau RM7 juta dikena bejalaika Program Pemungkal Ngintu Baru Kebun Rian renggat keterubah.

"Aku udah minta Opis Betanam Betupi Sarawak nempa kerejasama enggau Top Fruits bejalaika Program Pemungkal Ngintu Baru Kebun Rian ke udah bisi renggat keterubah iya nya 20,000 kayu rian ba beberapa kandang endur baka Limbang (5,000 kayu), Baram (5,000 kayu), Betong (5,000) kayu enggau Serian (5,000 kayu)," ku iya.

Uggah mansutka pekara nya lebuh dikerandau raban pengarang berita pengudah bejadika Program Ngintu Baru Kebun Rian ke diatur ba Dewan Serbaguna Teng Bukap, Padawan, Serian, ditu sehari tu.

Ungkup Serian dipadahka program tu deka mungkur pesereta ari Kampung Jambu, Kampung Pesang enggau Kampung Bunga di Serian.

"Aku minta ngagai kita pesereta ngambika meri kerejasama ngagai pegawai Opis Betanam Betupi enggau Top Fruits maya program tu dipejalaika," ku iya.

Kelimpah ari nya, Opis Betanam Betupi udah ngelala beberapa kebun rian ba stesen betanam betupi ba Semongok (Kuching), Tarat (Serian), Layar (Betong) enggau Kebuloh (Miri) nyadi plot demonstrasi dikena meri latih ngagai orang betanam betupi ke bisi pengerindu nanam rian. #UtusanBorneo