656,373 hektar Tanah NCR digazet nengah Seksyen 6
Cari Berita

Advertisement

656,373 hektar Tanah NCR digazet nengah Seksyen 6

Chief Editor | Berita Iban MY
May 1, 2018

Sapit Kepala Menteri Datuk Amar Awang Tengah Ali Hasan.

KOTA SAMARAHAN: Perintah nengeri udah mujur ngazet 656,373 hektar Tanah Hak Adat Bansa Asal (NCR) di serata nengeri nengah Seksyen 6 Kod Tanah Negeri (KTN).

Sapit Kepala Menteri Datuk Amar Awang Tengah Ali Hasan madah penyampau nya ngarika 834,696 hektar tanah NCR di nengeri tu ke udah disukat nengah Seksyen 6, KTN.

Program inisiatif nyukat tanah NCR nya ku iya ke mega Menteri Pemansang Industri enggau Dagang dipungkal kenyau ari taun 2010.

“Tanah NCR ti udah disukat chukup mayuh lalu kitai deka majakka pengawa nyukat ke alai pengawa tu dibagi ngagai dua renggat.

“Keterubah kitai nyukat kelingi lalu ditangkanka pengawa nyukat tanah lot.

“Tu mih komitmen perintah nengeri ti deka meri jamin tanah NCR sigi deka dikeluar surat pala tanah,” ku iya.

Iya mansutka jaku nya ba pengerami nyuaka surat pala tanah Seksyen 18 KTN nengah Inisiatif Baru NCR enggau Kampung Tradisional di Dewan Suarah Samarahan ditu.

Penyampau 428 surat pala tanah ke dikeluar nengah Seksyen 18 Kod Tanah Sarawak ungkup kampung tradisional disua ngagai 398 iku penerima ari Genturung Pendiau Empila enggau Genturung Pendiau Pangkalan Kuap ditu.

Kelimpah ari nya, Awang Tengah ba pengerami nya bisi mega nyuaka 14 iti surat pala tanah ke dikeluar nengah seksyen ke sama ngagai 14 iku orang empu tanah adat bansa asal (NCR) ari kandang endur Tanjung Parang.

Awang Tengah ke mega Menteri Pemansang Kandang Mengeri enggau Pengeraja Asal II nambah naka ke diatu 350 genturung pendiau ke mungkur 47,532 lot rumah udah disukat di serata Sarawak nengah Program Sukat Kampung Tradisional.

“Program sukat kampung tradisional seruran deka dipejalai ngambi ulih nentuka hak orang bempu tanah ba genturung pendiau ke udah lama ditumbuh diintu enggau manah,” ku iya.

Bela datai Kaban Kunsil Nengeri (ADUN) Stakan Dato Sri Mohammad Ali Mahmud enggau chalun Barisan Nasional Parlimen Kota Samarahan Rubiah Wang. #UtusanBorneo