Header Ads

  • Berita Tebaru

    #InjilSeharitu: Hari Enam, 26 Haribulan 5, 2018 ba Minggu Ketujuh Musim Selama (Memorial of Saint Philip Neri, Priest)


    Selamat pagi Hari Enam, 26 Haribulan 5, 2018 ba Minggu Ketujuh Musim Selama (Memorial of Saint Philip Neri, Priest), ngagai semua bala pemacha Berita Iban Online.

    Bacha Ke Satu:

    James 5: 13 - 20

    Menyadi:
    Kati bala kita bisi merinsa? Iya patut besampi. Kati bala kita bisi lantang ati? Iya patut belagu pantun puji.

    Kati bala kita bisi sakit? Iya patut mesanka bala tuai eklisia, minta sida besampika iya, nata iya ngena minyak dalam nama Tuhan.
    Sampi ti disebut ngena pengarap deka ngeraika orang ke sakit.Tuhan deka ngeraika sida, lalu enti sida udah bedosa, dosa sida deka diampun.

    Nya alai, kita patut ngaku dosa kita ngagai pangan diri, lalu besampika pangan diri, ngambika kita digeraika. Sampi orang ke lurus endang bekuasa sereta bisa.
    Elijah endang mensia baka kitai. Iya bebendar besampi minta hari enda ujan, lalu hari enda ujan di menua nya tiga taun setengah.

    Udah nya iya besampi baru; hari lalu ujan, lalu tanah mansutka asil.

    Menyadi, enti bala kita bisi limpang ari pemendar, lalu siku ari bala kita mai iya pulai baru, awakka kita nemu tu: barang sapa mai orang ke bedosa pulai baru ari jalai ti salah, deka nyelamatka semengat orang nya ari pemati, lalu deka ngasuh mayuh dosa diampun.

    Masmur Entara:
    Masmur 141: 1 - 2, 3 & 8

    Saut (peda 2a): Sambut meh sampi aku nyadika menyan.

    Ke Satu
    Aku ngangauka Nuan, O TUHAN. Tulung meh aku diatu!
    Pendingka aku, lebuh aku ngangauka Nuan.
    Sambut meh sampi aku nyadika menyan,
    jari ti diangkatka aku, nyadika piring lemai hari.

    Saut: Sambut meh sampi aku nyadika menyan.

    Ke Dua
    O TUHAN, jaga mulut aku, lebuh aku bejaku.
    Tang aku majak arapka Nuan, O TUHAN Allah Taala aku.
    Aku minta Nuan nyaga aku.
    Anang nejuka aku mati!

    Saut: Sambut meh sampi aku nyadika menyan.

    Alleluia (peda Matthew 11: 25)
    Alleluia, alleluia
    Beberekat meh Nuan Apai, Tuhan ke bekuasa di serega enggau di dunya,
    laban Nuan udah mandangka misteria Perintah ngagai bala anak mit.
    Alleluia.

    Bacha Injil Seharitu:

    Mark 10: 13 - 16

    Orang mai anak mit ngagai Jesus, ngambika Iya ngengkahka jari Iya atas sida. Sida murid lalu nganu orang nya.

    Tang lebuh Jesus meda nya, Iya pedis ati lalu bejaku ngagai sida murid Iya, “Awakka sida ke mit datai ngagai Aku. Anang nagang sida, laban Perintah Allah Taala diempu orang ke baka sida tu.

    Enggau bendar Aku madah ngagai kita, barang sapa enda nerima Perintah Allah Taala baka anak mit, enda ulih tama ngagai Perintah nya.”

    Iya lalu merap sida anak mit nya, ngengkahka jari Iya atas sida, lalu merekatka sida.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: