KM ngemendarka pengawa ngaga jalai Meradong ke Tanjong Manis
Cari Berita

Advertisement

KM ngemendarka pengawa ngaga jalai Meradong ke Tanjong Manis

Chief Editor | Berita Iban MY
May 1, 2018

Kepala Menteri (KM) Datuk Patinggi (Dr) Abang Johari Tun Openg.

BINTANGOR: Peranak di sitak Parlimen Sarikei ngarap deka bisi jalai nyambung pelilih Meradong enggau Jalai Tanjung Manis deka dijapai enda lama agi berindik ari pemendar ngaga iya ari Kepala Menteri (KM) Datuk Patinggi (Dr) Abang Johari Tun Openg kemari.

Projek Jalai Pasi-Sibu-Jalai Tanjung Manis sepanjai 17km nyengkaum sebuah jematan meraka Batang Rajang sepanjai 1.2km beungkus RM450 juta deka digaga tekala nya lalu dipelaba tembu dalam timpuh tiga taun.

Iya ngemendarka pekara tu pengudah bejadika Program Sejiwa Senada Meradong di Stadium Bola Keranjang Bintangor ditu, kemari, madahka projek nya endang udah lama dianti peranak di sitak parlimen nya.

Abang Johari madahka pengawa ngaga jalai nya deka ngemandakka pejalai antara pelilih Meradong enggau pelilih Sarikei seraya Tanjung Manis iya nya ‘perais perintah nengeri ngagai rayat di sitakParlimen Sarikei”.

Sebedau tu, peranak di sitak nya nengah Sibu, ngena Jematan Batang Igan penyauh 52km ari ditu.

Abang Johari madahka jalai nya ila deka meri pemaik ngagai bala pedagang betanam betupi di Bagi Menua Sarikei nganjung asil pemansut sida ngagai Tanjung Manis ti nyadi palan hab halal Sarawak, ngambika nyual produk sida ngagai menua luar.

“Bilun ti dibeli tau sangkai di Tanjung Manis lalu ulih ngemai kontena tiga tan asil betanam betupi ngagai Singapore ngambika dijual ngagai menua bukai. Nya alai kitai bisi aksesibiliti makit din,” ku iya nerang seraya nambah, Sarawak deka muka Opis Dagang Nengeri Sarawak di Singapura dalam taun baru.

Siti agi berita manah dibantaika Abang Johari iya nya projek ngaga bekal ai di pelilih Meradong, ke alai agih belanja penyampau RM81 juta udah dikemendar dikena melanja projek nya.

“Sambung paip besai ari Bulat Reservoir ngagai Temadak Reservoir nelan belanja RM30 juta, sambung paip besai Temadak Reservoir – Pasar Bintangor enggau ungkus RM25 juta sereta perambu ngaga booster pump station sereta sambung paip besai ngagai Jalai Kelupu-Julau-Durin-Jalai Ulu Strass, Batang Bintangor berega RM26 juta udah dikemendar,” ku iya.

Kededua projek udah dipelanja Bank Pembangunan Sarawak (DBOS).

Kelimpah ari nya, iya mega merambu ngaga Agro Park (Taman Pertanian) di Sungai Sian semak pasar Bintangor dikena nambah Agro Park di Sarikei ke alai perengka guna infrastruktur deka digaga perintah nengeri. #Bernama