Lima ribu buah RMM ulih dibeli deka digaga ulih perintah di sitak Stampin - Berita Iban Online

Header Ads

  • Baru Nyadi

    Lima ribu buah RMM ulih dibeli deka digaga ulih perintah di sitak Stampin

    SEMAYA DR SIM: Sim (tiga kiba) mendingka penerang enggau silik pasal projek RMM Kampung Bunga Rampai di Bau, kemari.

    BAU: Lima ribu buah rumah ke ulih dibeli enggau rega ke umbas iya deka digaga ulih perintah di sitak parlimen Stampin ngambika ulih dibeli ulih mensia mayuh ke ngembuan pemisi ke umbas iya.

    Menteri Opis Kandang Menua enggau Pengawa Berumah, Datuk Sim Kui Hian madah tu entara pekara ke disemaya iya enti iya dipilih nyadi Kaban Parlimen (MP) Stampin kena 9 Mei tu ila.

    “Kelimpah ari nyendiaka rumah ke raban sida ke mimit pemisi, kitai mega ulih nyendiaka rumah ngagai sida ke ngembuan pemisi ke umbas iya,” ku Dr.Sim madah lebuh muka projek ‘Rumah Mampu Milik (RMM) Kampung Bunga Rampai’ semak ditu, kemari.

    Pekara tu ulih dijapai enti tubuh sereta nyawa pengari MP BN kitai ari Sarawak chukup ba renggat Perintah Besai.

    Orang ke nyaga menua kediatu, Menteri Besai Datuk Seri Najib Tun Razak ku iya, udah besemaya deka mulaika hak minyak enggau gis menua tu ngagai Sarawak.

    Iya nandu baru madahka enti hak minyak enggau gis menua tu dipulaika ila, ekonomi tu ke deka ngangkatka projek pemansang di menua tu.

    “Awakka anak Sarawak dikemeratka dulu. Ke sekali tu pengudah 55 taun, tu peluang kitai beratika BN deka menang besai,” ku iya.

    Ba lansa bukai, bepelasarka rikod ari Opis Housing Development Corporation (HDC) - opis ke betanggungjawab ngemansangka rumah ke ulih dibeli di Sarawak, diperatika bisi pengurang bekal rumah ke ulih dibeli di sitak Kuching enggau Kota Samarahan.

    “Lalu bisi diperatika mega, mayuh sida ke deka meli rumah enda tebelika rumah laban pedis bulih lun ari palan wang,” ku iya.

    Iya nandu baru madahka entara 20 ngagai 30 persin sida ke bisi ati deka meli rumah, enda nyadi meli rumah ketegal kurang pemisi.

    Sama bisi enggau bejaku ba atur pengawa nya, ADUN Batu Kitang, Lo Khere ke ngelalau mensia mayuh meri sukung sida iya ngagai Dr.Sim maya PRU14 tu ila.
    Lo nyerumba Dr. Sim nyadi chunto ke manah laban udah ngaga pengawa iya enggau naka ulih, ke rayat dalam kapasiti iya nyadi ADUN Batu sereta presiden SUPP.

    “Sukung meh Dr. Sim baka kita ke udah nyukung aku,” ku Lo lalu nandu baru madah ngelakka Dr. Sim bejaku ngarika mensia mayuh di Sarawak lalu awakka nyawa iya didinga di Dewan Negara.

    Bekait enggau pekara nya, iya madah, iya arap endar penuduk Stampin nya deka dipulaika ngagai SUPP-BN kena 9 Mei tu ila.

    Ba projek rumah ke ulih dibeli nya ti digaga di Kampung Bunga Rampai, deka digaga bepelasarka dua buah model, iya nya: bansa 1 (78 unit) lalu bansa 2 (44unit) digaga ngena sistem IBS lalu dipelaba tembu digaga dalam kandang 21 bulan tu ila.

    Projek tu ti dikemendarka dalam bulan Nov 2017 deka digaga ba sebuah tanah dalam pemesai 11.8 ikar (urung 700 kaki persegi ke sebuah unit), lalu projek tu digaga enggau ungkus RM22 juta.

    Rumah ke digaga nengah HDC nya deka diberi dulu ngagai mensia mayuh ke diau di tebing sungai, laban raban tu ke napi penanggul tanah tusur besemak enggau sida dia. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads