Nembiak ti landik bejaku English ngembuan mayuh pengelebih
Cari Berita

Advertisement

Nembiak ti landik bejaku English ngembuan mayuh pengelebih

Chief Editor | Berita Iban MY
May 2, 2018

BESAI AGI PELUANG: Huang benung nyain plak kelai bejadika Palan Belajar Jaku English SMK St. Anthony.

SARIKEI: Jaku English ti nyadi jaku antarabansa muka mayuh agi peluang ngagai bala nembiak sekula ngemayuhka penemu sida kelimpah ari nambahka pengulih sida diambi kereja.

Kaban Kunsil Nengeri (ADUN) Repok, Dato Sri Huang Tiong Sii lebuh dikangau bejadika Palan Belajar Jaku English Sekula Sekondari (SMK) St Anthony diti, Hari Satu nyin tadi, madahka bala nembiak ti landik bejaku English ngembuan peluang manah agi diterima masuk ngagai universiti ke tebilang nama, lalu maya udah abis belajar sida ngembuan peluang ke manah diambi bekereja.

Iya mega muji sekula ti meri pemerat ba pengawa ngajar enggau belajarka Jaku English ngagai bala nembiak.

Huang mantaika pengarap ati iya ke alai bala pengajar SMK St Anthony ari baruh embing Prinsipal Vincent Liong deka seruran teulihka penyulut ba akademik enggau aktiviti ko-kurikulum.

Nyadi pengari rayat di kandang menua nya, iya temegah ba semua pemujuur ke dijapai sekula ngelama tu, ku iya seraya ngarapka ngagai deka majak tetangkupka peminta peranak di Sarikei.

Ngarika sekula, Vincent meri terima kasih ngagai Huang ba pengawa enggau sukung iya ti ngujungka sekula mujur numbuhka Palan Belajar Jaku English.

Huang udah gerah jari meri 14 unit komputer enggau tiga unit penyelak dikena nyikap palan nya, ku iya.

Berebak enggau pengawa nya, Huang enggau tiga iku temuai bukai dipebasa nyuaka insentif ngagai 107 iku nembiak ti teulihka pemutus peresa ke manah ba peresa SPM taun nyin tadi.

Sama bisi datai Chairlady Serakup Apai Indai enggau Pengajar (PIBG), Maureen Chua enggau Chairman Kaunsil Pengatur Pengawa, Rev. Father James Ting. #UtusanBorneo