Header Ads

  • Berita Tebaru

    PEDAS ngandalka perintah PH ulih ngamatka manifesto PRU14

    Presiden PEDAS, Mejar (B) Capt Collin Imran

    KUCHING: Serakup Dayak Sarawak (PEDAS) ngandalka perintah Pakatan Harapan (PH) ulih ngamatka manifesto sida rambau Pengawa Bepilih Besai Ke-14 (PRU14) tu tadi.

    Presiden PEDAS, Mejar (B) Capt Collin Imran meri pengaga ati ngagai PH ba pemujur sida numbuhka perintah baru di renggat perintah besai sereta pengawa maduka Tun Mahathir nyadi Menteri Besai Malaysia ke-7.

    Ku Collin, PEDAS ngarapka PH enda ngelebu pengandal semua peranak Malaysia kelebih agi raban bansa Dayak ti udah meri sukung tegut dataika PH mujur menang ba 12 penuduk dibida enam penuduk rambau PRU13 suba, ke alai enam penuduk nya kubu tegap Barisan Nasional (BN), majoriti pengundi Dayak.

    Nangkan nya ku Collin, PEDAS minta perintah baru dikemudika PH ngemeratka sekeda pekara ti ngaul nengeri tu.

    Keterubah, nentuka institusyen akim menua nyadu sebuah gempung undang-undang ti lurus enggau adil, tu nyengkaum bala pemesai pemansik Polis DiRaja Malaysia (PDRM), pemesai pendakwaraya enggau panel akim.

    PEDAS mega minta ngambika kes ti ngaul munuh bujang berani ti negika hak tanah Adat Bansa Asal (NCR), niang Bill Kayong dipechara baru lalu dipansik silik ngambika pengerentang ulih ditegi.

    Kedua iya, meri pemerat ba pengawa mulaika hak Sarawak enggau beratka pemansang menua pesisir kelebih agi ari sukut nyediaka infrastruktur pemun ti agi jauh tinggal. Tu beguna amat dikena ngenyemakka takah pemansang di kandang mengeri enggau menua pesisir, ku Collin.

    Pekara ketiga iya nya nginsil pemutus pechara tanah NCR ti udah alah di Kort Besai lalu neritka kuasa baka ti udah disempekat dalam Sempekat Malaysia 1963 (MA63) ke alai pekara tanah NCR semina tau dipechara ba kort tinggi Borneo aja.

    “Pulaika Jaku English nyadi batang jaku semua subjek dalam timpuh lima taun kelimpah Jaku Malaysia nyadi teras subjek. Kebuah pia, dunya kemaya hari begunaka rebak baru nguasa jaku tu ngambika ulih besemakih kelebih agi ba makit kereja.”

    “Kitai mega minta perintah besai ngelala lalu ngenegapka Majlis Adat Istiadat Sarawak (MAIS) nyadi sebuah gempung ti diberi kuasa ngatur pekara bekual enggau Adat Lama komuniti di menua tu. Kebuah pia, kitai bisi atur tauka chara mutarka penanggul bala komuniti ngena rurun adat kitai empu, kelebih agi pekara bekaul enggau rayat sereta menua,” ku Collin madah nyemetak.

    Kelimpah ari nya, PEDAS mega ngarapka abis nadai dua iku menteri penuh PH ari Sarawak di dalam lis kabinet seriris enggau konsep numbuhka Malaysia ke alai Sarawak ukai siti ari nengeri tang sebuah wilayah tauka menua. Nya alai, nengeri tu bisi hak bekunsika kuasa antara ketetiga wilayah Malaysia patut sebela.

    “Udah nyadi pengandal semua peranak Malaysia kelebih agi peranak Sarawak ngambika perintah baru dikemudika PH enggau Tun Mahathir ulih ngemai Malaysia ngagai tikas nyulut agi sereta ngemeratka mayuh agi pemansang di Sarawak ngambika sebela enggau pemansang ti udah dijapai tanah Semenanjung,” ku Collin nyimpul penemu.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: