Header Ads

  • Baru Nyadi

    Perintah nengeri setuju ngemendarka lima sekula ke suah kena bah dipindah

    Gambar di SK Kuala Muput maya napi penusah ampuh bah bulan 2 taun tu tadi.

    TATAU: Pemutus digaga perintah nengeri meri pemendar tekala nya apin lama ke udah mindahka lima buah sekula pemadu suah dituntung penusah bah di pelilih tu ngagai endur baru, lantang diterima bala pengajar enggau apai indai di sitak menua ulu di bagi menua tengah Sarawak tu.

    Lima buah sekula nya iya nya Sekula Primari (SK) Nanga Penyarai, SK Rumah Keseng, SK Rumah Tayai, SK Nanga Tau enggau SK Kuala Muput di pelilih Tatau di sitak Parlimen Selangau.

    Pemesai Pelajar Pelilih (PPD) Tatau, Mohadi Bin Mobin madah ari lima sekula nya, SK Nanga Tau enggau SK Kuala Muput napi 100 peratus rusak ngaul lenyau reta enggau struktur ba penusah bah besai nuntung bulan Febuari nyin tadi.

    “Ba Februari tu tadi, PPD Tatau udah mantaika perambu ngagai Kepala Menteri, Datuk Patinggi Abang Johari Tun Openg, ngambi mindahka limba buah sekula nya ngagai siti endur ti likun agi. Alhamdulillah, perambu nya nerima perati lalu iya (Abang Johari) udah ngemendarka perambu nya,” ku iya madah ngagai Bernama.

    Penusah bah nya ngujungka SK Kuala Muput napi pengerugi urung RM1.3 juta seraya SK Nanga Tau urung RM650,000. Ngelansa silik, ku Mohadi, pemutus Abang Johari ke mega Chairman Barisan Nasional (BN) nyadi diterima manah peranak ngelingi dikena nentuka pelajar bala anak sida enda tejanggal.

    “Pekara pemadu besai, pemutus mindahka sekula ngagai endur meruan agi ngambika atur belajar enda dikachau, ari pemisi taba baru tu, bala nembiak sekula enggau bala pengajar ulih ngajar enggau lantang sereta likun agi,” ku iya.

    Ditanya pasal pengerembai pemadu baru pengawa mindah nya, ku Mohadi, peranak empu deka merambu endur ti patut.

    “Kitai deka berandau enggau tuai rumah sereta peranak minta penemu dini endur ti patut. Kepala Menteri empu dekaka endur baru tu ila ba endur tinggi agi, besemak enggau jalai alun, lantang sereta likun ungkup bala nembiak sekula,” ku iya.

    Ba lansa bukai, Chairman Serakup Apai Indai enggau Pengajar (PIBG) SK Kuala Muput, Janang Kijun madahka iya begulai enggau apai indai ke bukai ngarapka atur pengawa ngemanah sereta mindah ulih dipejalai enggau naka jampat.

    “Kami apai indai ngarapka pengawa mindahka sekula ngagai endur baru ti manah agi ulih nyeliahka atur pelajar bala anak kami tejanggal ketegal penusah bah ti suah nuntung,” ku iya. #Bernama

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads