PM patut nyiri pengari rayat ari Sabah enggau Sarawak dalam kabinet - Berita Iban Online

Header Ads

  • Baru Nyadi

    PM patut nyiri pengari rayat ari Sabah enggau Sarawak dalam kabinet

    Menteri Besai (PM) Tun Dr Mahathir Mohamad

    MIRI: Menteri Besai (PM) Tun Dr Mahathir Mohamad patut nyiri pengari rayat ari Sabah enggau Sarawak dalam rintai penuh kabinet dikena ngemujurka pejalai pengawa perintah.

    Pemerati Politik, Datuk Wan Zain Syed Mohdzar madah, sigi bisi pemerat ba perintah Pakatan Harapan (PH) berundingka pengari rayat Sarawak nyadi menteri tauka sapit menteri.

    “Parti bechampur PH di Sarawak mega udah nyaup pemenang PH di Putrajaya, nya alai, pengabis manah runding ngambi pengari rayat tu dichiri dalam rintai kabinet,” ku iya madah lebuh dikerandau ulih Utusan Borneo kemari.

    Wan Zain madah sigi beguna endar bisi pengari rayat Sarawak dalam rintai penuh kabinet ngambika Sabah enggau Sarawak mega enda tinggal ari sukut pemansang.

    “Maya ngerintaika renggat pemungkal rintai Kabinet, nadai meda pengari rayat ari Sabah enggau Sarawak.

    “Taja pia, kitai ngarapka dalam timpuh dua minggu tu ila maya ngerintaika kabinet penuh, deka meda dua tauka tiga pengari rayat ari Sarawak dichiri nyadi menteri enggau sapit menteri,” ku iya.

    Iya madahka tuduh pangku pengawa nya sigi beguna laban pekara ke bisi bekait enggau pejalai pengawa Perintah Besai enggau Menua patut dikemutar sama-sama.

    “Mayuh pekara ke patut diangkatka, kelebih agi beratika penanggul rayat Sarawak ke agi tinggal ari sukut infrastruktur menua pesisir.

    Bekait enggau pekara tu mega, Wan Zain madahka Barisan Nasional (BN) Sarawak patut numbuhka gempung baru, ngaga kaul ke terit enggau PH di renggat Perintah Besai.

    “Ambika chunto, nyema bisi gempung parti Sarawak tau ditumbuhka laban kitai beratika gaya politik baka ke nyadi diatu, lalu iya deka meri penguntung ngagai kededua Perintah, Besai enggau Nengeri,” ku iya.

    PH mega enda tau enda ngamatka semua manifesto ke udah disemaya sida iya ngagai rayat nyengkaum nyerah pulai baru hak dalam Sempekat Malaysia 1963 ke majak tusur.

    Ba lansa bukai, Tun Mahathir bisi madahka lis raban kabinet ke bukai deka dipadah dalam timpuh dua minggu tu.

    Tu laban bisi sekeda opis menteri ke bukai, ke berat endar enda tau enda disengkaum, baka Opis Menteri Luar.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads