RM57 juta dikemendar dikena ngemanah pasar Selangau - Berita Iban Online

Header Ads

  • Baru Nyadi

    RM57 juta dikemendar dikena ngemanah pasar Selangau

    SELFIE DULU KITAI: Abang Johari (tengah) selfie enggau peranak menua nya di Selangau kemari.

    SELANGAU: Kepala Menteri Datuk Patinggi Abang Johari Tun Abang Openg udah ngemendarka agih belanja sepenyampau RM57 juta dikena ngemanahka agi pasar Selangau.

    Iya madah, agih belanja tu nyengkaum dikena ngaga sebuah Mini Kompleks Lumba enggau Main ke beungkus RM8 juta enggau projek ngemanahka tebing sungai pasar Selangau ti beungkus RM5 juta.

    “Penyampau tu mega nyengkaum projek ngemanahka Jalai Kelebu-Rumah Ado sepenyampau RM25 juta, projek Jalai Siong Ili, panjai 16.5 km (RM17 juta) enggau projek ngemanahka Jalai Kemena-Balingian, panjai 5 km ti ngena belanja RM2 juta,” pia ku iya madah maya Pemesai Begulai enggau Rayat ba Pasar Selangau, kemari.

    Bela datai maya tu iya nya Kaban Kunsil Nengeri (ADUN) Tamin Christopher Gira Sambang enggau chalun Barisan Nasional (BN) Parlimen Selangau Rita Insol sereta bala bukai.

    Chairman BN nengeri tu mega madahka, pasar Selangau mega deka dikemansangka agi enggau sebuah Palan Transformasyen Menua Pesisir (RTC) tang deka digaga sepengudah projek Pan Borneo tembu.

    “Kelimpah ari nya, kitai deka ngemansangka opis baru ditu seririh enggau Selangau ti nyadi siti ari pelilih menua ba nengeri tu,” ku iya madah baru.

    Ungkup raban bansa China, Abang Johari bela besemaya deka ngaga dewan makai ba sekula China ditu.

    Berebak enggau tu mega, iya madahka pemutus milih Rita laban ke meda rayat di Selangau ngemeranka penyerakup.

    “Kitai enda kakang milih Rita nyadi chalun laban ke beguna iya nya kitai meseti ngira pengidup rayat ditu dudi hari.

    “Kitai enda ulih nyeliahka diri ari pemansang,” ku iya sambil minta rayat dia nyukung Rita maya pengawa bepilih tu ngambika nyadi indu Dayak keterubah nyadi Kaban Parlimen.

    Abang Johari mega madah, suba bisi niang Datuk Sri Tra Zender nyadi indu Dayak keterubah megai pengawa Kunsil Nengeri.
    Niang ku iya, siku indu ti bebasa sereta mayuh nyaup ngemansangka politik nengeri tu.

    “Sehari tu kitai bisi Rita.

    “Diatu ke beguna iya nya kitai meseti nanggam penyerakup antara pangan diri dikena kitai napi pengidup jemah ila,” pia ku iya madah.

    Bekaul enggau pemansang nengeri tu, iya madah, iya enda kakang ngelanggur projek ti ngena ungkus besai nyentuk bebillon ringgit laban penatai pemisi nengeri tu deka nambah ari asil minyak enggau gis.

    “Taja pia aku empai deka madah berapa penatai pemisi ke diulih ari minyak enggau gis.

    “Nganti bulan Oktober ila aku madah,” ku iya madah baru. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads