RM60 juta dikemendar ungkup ngaga projek jalai ari Sibu Jaya ke Lanang - Berita Iban Online

Header Ads

  • Baru Nyadi

    RM60 juta dikemendar ungkup ngaga projek jalai ari Sibu Jaya ke Lanang

    ARI SIBU: Stanley ngarika ketuai raban bansa Sibu nyuaka tepa ngagai Abang Johari seraya dikemata Dr Rundi (kanan) enggau Kelvin maya Pengerami Pemesai Begulai Enggau Rayat di Sibu Jaya, kemari.

    SIBU: Sibu Jaya deka dikemansangka enggau manah agi nyadi sebuah agi mengeri kelimpah mengeri Sibu.

    Ketegal nya Kepala Menteri Datuk Patinggi Abang Johari Tun Openg udah ngemendarka agih belanja sepenyampau RM60 juta dikena ngaga jalai baru ti muntang ari Sibu Jaya ngelawa Lanang.

    Iya madah, jalai semanjai enam kilometer tu digaga nengah standard R3 ti ngembuan empat lurung.

    “Projek jalai tu disadang deka tembu dalam kandang dua taun setengah.

    “Penembu jalai tu tau bendar nyungkak tikas penatai pemisi rayat di Sibu Jaya laban mengeri tu deka muntang agi dilawa orang bukai nyengkaum temuai ari menua luar,” pia ku iya madah.

    Iya bejaku munyi tu maya Pengerami Pemesai Begulai Enggau Rayat di Sibu Jaya, kemari.

    Sama bela datai iya nya Menteri Perengka Guna Mensia Mayuh Dato Sri Stephen Rundi Utom, Menteri Muda ba Opis Kepala Menteri (Pemansik Sains enggau Bioteknologi) Dr Annuar Rapa’ee, Kaban Kunsil Nengeri Dudong Datuk Tiong Thai King, Chairman PBB Tan Sri Bustari Yusof, chalun BN ungkup Parlimen Lanang Kelvin Kong enggau Pemancha Stanley Geramong.

    Kelimpah ari projek jalai nya, Chairman Barisan Nasional (BN) nengeri tu madahka Sibu Jaya bela disikap enggau sebuah masjid ke beungkus RM30 juta ti umbas alai 3,000 iku orang.

    “Ba Atur Pemansang Malaysia Lumpar Ke-11 (RMK11), kitai mega deka nambah sebuah agi sekula ba Sibu Jaya bepun ari sekula ke diatu udah sekut ketegal penyampau tubuh nembiak ke mayuh,” ku iya nerang.

    Iya madah, laban genturung menua nya diuan pupu raban bansa, sebuah balai mensia mayuh bela deka digaga dia ngambika lantang alai sida ngatur pengerami tauka pengawa bekaul.

    Ku iya, naka ke diatu langkar projek nya udah digaga tang penyampau ungkus ke dikena empai temu.

    Ari semua pemansang nya, Abang Johari bela beratka pekara digital ke alai librari dia deka disikap enggau perengkaguna digital.

    “Librari tu dikena kitai matih bala nembiak ngambika sida teleba enggau pekara baru,” ku iya madah baru.

    Iya madah, enti menua tu likun dia perintah deka lantang berunding numbuhka mayuh agi pemansang ungkup rayat sereta randaka kerejasama ke manah antara perintah nengeri enggau perintah besai.

    Berindik ari nya, Abang Johari minta rayat ba Parlimen Lanang enggau Sibu ulih nyukung BN maya Pengawa Bepilih Besai Ke14 (PRU14) tu.

    “Enti kita nyukung Kelvin enggau chalun BN ba Parlimen Sibu, Andrew Wong dia mengeri Sibu deka lantang agi dikemansang.

    “Seduai menang reti iya kita deka bisi dua iku Kaban Parlimen lalu ditambahka kemari (ensana) aku minta Kunsilor Robert Lau nyadi senator.

    “Enggau tu Sibu deka bisi dua iku Kaban Parlimen enggau siku Senator di Putrajaya lalu mengeri Sibu silik agi dikemansang udah tu,” ku iya sambil madah kelimpah sida tiga nya, ditu mega udah bisi Dr Annuar enggau Tiong. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads