Ruai Rumah Entering Usah runtuh maya bejalaika pengawa kimpin - Berita Iban Online

Header Ads

  • Baru Nyadi

    Ruai Rumah Entering Usah runtuh maya bejalaika pengawa kimpin

    Gambar ba palan penusah kenyadi.

    SIBU: Maya pengawa kimpin politik dipejalaika di Rumah Entering Usah, Pasai bebali nyadi begau pengudah ruai rumah panjai nya runtuh ngenyit lemai kemari.

    Nitihka ke diterima "Berita Iban Online" penusah nyadi urung jam 4.30 lemai maya Tuai Rumah Entering benung bejaku ngelaluka bala temuai ke datai ngulu pengawa nya.

    Maya penusah nyadi, tiga iku indu diripotka luput ketegal tekenyit meda penusah nyadi, tang siku ari indu ke luput nya dianjung ke klinik besemak ngambika ulih diperubatka enggau silik agi.

    Nitihka penerang ari Entering, 46 taun, iya maya nya benung bejaku tauka meri licha ba siti ari ruai rumah panjai nya, enda ngadang ruai tak ngenyit runtuh.

    "Lebih 50 iku indu enggau anak mit ke benung duduk ba ruai nya. Ruai nya runtuh ngenyit ba endur tengah ruai lalu ngejungka semua sida iya labuh kebaruh.

    "Puji Tuhan laban sida nadai nenama semina telih mimit ketegal kena paku lawang enggau kayu, ku iya madahka bala pengarang berita sehari tu tadi.

    "Urung penyampau 1,000 iku ari lapan buah rumah panjai di Pasai ke bisi datai ngulu program Pengawa Bepilih Besai Ke-14 (PRU14) nya", tandu iya baru.

    Rumah Entering tu digaga pengelama lebih 30 taun ke udah, pemanjai 22 pintu bilik enggau lebih 150 genturung pendiau dia. Rumah panjai tu besemak enggau palan Parlimen Sibu. #BeritaIban

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads